«Мариэнергон» специалистше-влак республикысе тӱҥ вузлан шотлалтше Марий кугыжаныш университетын электроэнергетике факультетшын выпускникше-влаклан кугыжаныш аттестат комиссийын пашаштыже лийыныт.
Выпускник-влак иктешлыше квалификаций пашаштым онлайн-форматыште араленыт. Ончычак илышыш пурталтше поро йӱла почеш экзамен комиссийын еҥже радамыште профессионал-практик-влак – «Рӱдӧ да Юл кундем Россеть Мариэнерго» филиалын энергетикше-шамыч – лийыныт.
А онлайн-формат эпидемий амал дене икымше гана кучылталтеш. Квалификаций пашам аралымаш выпускник-влакын тазалыкыштлан лӱдыкшым ыштыде эртышаш, сандене нуно шке дипломыштым мӧҥгӧ гыч араленыт.
«Диплом пашаштым аралымаште чыла студент-влак ӱшанлын, шонен вашештеныт да сай результатым ончыктеныт, — каласен «Мариэнерго» директорын алмаштышыже Юрий Егошин. – Выпускник-влаклан пуымо диплом ӱмырешлан пеленышт кодеш, а МарГУ-н электроэнергетике факультетыштыже налме шинчымаш кызытсе жапын йодмашыжлан келшен толеш. Ме нуным шкенан дене вучена».
Ю.ИСАКОВ
