САМЫРЫК ТУКЫМ

Воктенет – самырык еҥ: «Муро мыланем икшыве гай»

Тачысе лаштыкнан унаже — Морко район Эҥерӱмбал ялын уста ӱдыржӧ Христина Александрова. 

— Школышто тунеммет годымак почеламутым возкаленат. Кызытат сылнымутлан шӱман улат?

— Возаш мыйым Азъял школышто икымше туныктышем Елена Леонидовна Смирнова кумылаҥден. Тудо шочмо йылмынам да калыкнам йӧраташ туныктен. Тыгак туныктышем Татьяна Геннадьевна Гавриловалан тауштем. Тудо почеламутым, ойламышым сераш эреак таратен, возымем газет ден журналлашке колтылын. А Коркатово лицейыште сылнымутлан эшеат чот шӱмаҥынам. «Самырык тукым» конкурсышто вием ятыр гана тергенам, сеҥышыш лектынам. 2010 ийыште журналистикыште чолган возымемлан Зинаида Яковлева лӱмеш премийын лауреатше лийынам. МарГУ-што Калык тӱвыра да тӱвыра-влак кокласе кыл институтышто 1-2-шо курсышто тунеммем годым «Поэзий шепка» сылнымут ушемыш коштынам. Чаманен каласыман, тудо ынде пашам ок ыште. Тушто мый шкаланем шуко уым налынам. Поэт-влак дене вашлиймаш, семинар-шамыч возымо мастарлыкем шуараш полшеныт.

— Такшым тый прозыштат устан серет…

— 2-шо курсышто тунеммем годым Шкетан лӱмеш национальный драмтеатр пелен пашам ыштыше «Усталык лабораторийыш» коштынам. Тудым Татьяна Соловьева (Светлакова) вуйлатен. Тушко пьесым возаш тунемаш шонышо-влак погыненыт. Ме ятыр лӱмлӧ еҥ дене вашлийынна. Мыят иктаж-кунам пьесым возем манын ӱшаненам, но лабораторий тений шошо марте веле пашам ыштен. Туге гынат тудо чонешем кугу кышам коден, кӱлешан шинчымашым пуэн да пьесым возаш кумылым луктын. Но яра жапыште возкалем, газетлашке статьям-влакым колтедылам, поснак «Кугарня», «Морко мланде» газетла дене пенгыде кылым кучем. «Марий Эл» газетыштат икмыняр материалем савыкталтын.

— Пытартыш жапыште икмыняр мурызо мурет-влакым йоҥгалтара…

— Мурым возаш «У муро» клубыш кошташ тӱҥалмем таратен, очыни. Бард Геннадий Григорьев мурым возаш туныкта, композитор дене вашлиймашым эртара. Тудо пашам-влакым жапыштыже ужын шуктен да почеламутемлан семым келыштарен.

Кумданрак — «Марий Эл» газетын
2017 ий 23 декабрьыште лекше номерыштыже лудын кертыда.

Лидия ШАБДАРОВА.

Опубликовать в Одноклассники

Добавить комментарий