Теҥгече правительстве пӧртыштӧ Марий Элын у военный комиссарже дене палымым ыштеныт. Тудлан Юрий Аксёновым шогалтеныт.
Регион вуйлатыше ден у военкомын пашаче вашлиймаштышт Рӱдӧ военный округын Марий Элысе инспекторжо, генерал-майор Анатолий Самсонов ден республикын военный комиссариатшым але марте вуйлатыше Сергей Сидоркин лийыныт.
— Военный комиссариатыште ятыр ий пашам ыштымылан да республикысе самырык-влакым военно-патриотически куштымаште чолган тыршымыжлан Сергей Михайлович Сидоркинлан шке, ача-ава-влак да общественность лӱм дене тауштем, — тӱҥалтыште каласен Александр Евстифеев.
Республикын у военный комиссарже дене палдарымыж годым Анатолий Самсонов тудын опытан да тиде пашам шукташ келшен толмыжым палемден.
Полковник Юрий Викторович Аксёнов Дальний Востокышто, Таджикистаныште службым эртен. Военный комиссариатыште пашам ыштыме опытшо уло, — каласен тудо.
Юрий Аксёнов Омскысо кӱшыл общевойсковой командный училищым да РФ-н ВС-шын Общевойсковой академийжым тунем пытарен. Дальневосточный, Приволжско-Уральский да Рӱдӧ военный округлаште служитлен.
Марий Эл вуйлатыше Александр Евстифеев Юрий Аксёновым саламлен да республикыштына сайын пашам ышташ тыланен.
Марий Эл Республикым вуйлатышын организаций да
аналитике виктемжын уверже-влак негызеш
Л.КАМАЛЕТДИНОВА ямдылен
