Шыже – идалыкын эн уста да эн поро сӱретчыже. Шинчам тыге куандарышын, шӱм-чоным тыге тарватышын тудо гына сӱретлен мошта. Чиямат чаманыде кучылтеш: нарынчым, йошкаргым, кӱреным – чылажым каласенат от мошто. Тыгодым кушкыл лышташым веле огыл чиялта, саскаланат сылне тӱсым тушкалта. Теве пызлыгичке ден поланым кузе йошкартен!..
Шыже Юлсер кундемысе шым Шайрамат ӧрдыжеш коден огыл. Тугакшат ямле вер-шӧрлан сылне тувыр-шовырым чиктен, мотор шовычым пидыктен, йытыра ӱштым ӱшталын… Кеч Нурмучаш Шайра курык вуй гыч ончал, кеч Руш Шайра ял йымалне верланыше Мӱшыл ер сер гыч эскере – чыла вере Шыжын усталыкше да мастарлыкше.Ужарге-нарынче-йошкарге-кӱреналге лышташла кокла гыч ял уремжат, тошто школжат, ончычсо тӱшка озанлык пасужат, Элнет чодыражат, тораште-тораште верланыше Карман курыкшат йомакысе гай койыт. Мӱшылат вашталтын, тудо утларак волгыдо да сымыстарыше кандалге-ужар тӱсан лийын. Тыгай моторлыкым эсогыл пият ӧрын-куанен онча. Памаш гына телыже-кеҥежше, шошыжо-шыжыже ик семын йыргыктен йога…
Маргарита ИВАНОВА.
М.Скобелевын фотожо.
