Россий МЧС-ын Марий Элысе Тӱҥ управленийжын пашаеҥже Сергей Сёмин «Рӱдӧ да Юл кундем округлаште Россий МЧС-ын тӱҥ управленийжын кризис ситуацийыште виктем рӱдержын эн сай оперативный дежурныйжо» семын палемдалтын.
Тидыже смотр-конкурс гоч рашемдалтын. Тушто Марий Элын чапшым лач тудо арален. Мом вара тергеныт? Профессиональный кӱкшытшым пеҥгыдемдыше кӱлеш документ деч посна Сергей Сёминлан видеоконференций режим гоч конкурс комиссийлан шуктымо пашаж дене кылдалтше йодыш-влаклан вашешташ логалын.
Сергей Юрьевич МЧС системыште 17 ий наре ышта. Тышеч оперативный дежурныйын пашажым кандаш ий шукта. Погымо опытшто кеч-могай йодышым пеш писын решатлаш полша. А тиде качестве ты пашаште ик эн тӱҥлан шотлалтеш. Ятыр гана тудлан республикыште лийше чрезвычайный ситуаций годым оперативный службо-влакын пашаштым кӱлеш семын виктарен колташыже логалын. Эн шарнымашеш кодшыжо 2010 ийысе кеҥеж лийын, вет тунам кечеш 20 наре дене чодыра пожар ылыжын. Сергей Юрьевич элкӧргӧ пашан подполковникше марте служитлен шуктен. Тудым сай ача, пелаш семын палат. Спортлан кумылан, сонарыш, кол кучаш кошташ йӧрата.
Тиде смотр-конкурсышто кокымшо ден кумшо верым Чуваш Республик да Киров область гыч коллегыже-влак налыныт.
С.Носова.
Снимкыште: С.Сёмин — паша верыште.
