23 июльышто Йошкар-Оласе «Дружба» стадионышто куштылго атлетике дене Марий Эл Республикын кубокшо верч таҥасымаш эртен. Тудо тыгак олимпийский кече семын палемдалтын.
Турнирыште 182 еҥ вийжым терген. Нунын кокла гыч 20 участник Татарстан гыч лийын. Тыгак 35 деч кугурак ийготан-влак, 27 ветеран-спортсмен стартыш лектыныт. Эн опытанже тений 76 ийым темен.
18 ияш марте ийготан-влак коклаште Марий Элын у рекордшым шындыше Никита Чирковым поснак палемдыман. Рвезе Олимпийский резерве училищыште тунемеш, 400 метр кутышым 50,43 секундышто эртен. Тренерже – Константин Лукьянов. Ончычсо рекордшо С.Киселев (51,6 сек) ден А.Эмановын (51,64 сек) лийын.
Игече путырак шокшо ыле. Сандене участник-влаклан палемдыме корнышто веле огыл пўжвўдым йоктараш логалын.
– Тидланже ме тунемынна ынде. Эртаралтше таҥасымашлаште вием тергашак тыршем, – ойла шке тўшкаштыже икымше верым налше, Морко кундемын тале эргыже, куштылго атлетике дене спорт мастер, кызыт ветеран-шамыч коклаште таҥасыше Валерий Романов (снимкыште). – Вич километрыште икымше верыш лектым. Кодшо арнян Зеленодольскышто экстремал пелемарафонышто таҥасенам. Чодыра коклаште, но ошман корнышто куржынна, шке группыштем икымше лийым. Молан эшеат эре куржталам? Ялысе илышыш могай-гынат ойыртемым пурташ тыршем. Йокрок лиеш гын, колым кучаш каем, шудым солем, тыгак пареҥгым сомлена, урена… Чылажат могай-гынат упражненийыс. Искусственный монь огыл. Тидыже пайдалырак, шонем. Вий-куат пыта, тудыжым ялысе паша, пўртўс пойдара.
Теве тыге. Ветеран-спортсмен-влак мастарлыкым, усталыкым огыт йомдаре. Адакшым тыгай таҥасымашлашке лектын, самырык тукымлан эреак пример лийыт.
Е. ЭШКИНИНА.
