Тиде кок фотографийым редакцийыш Йошкар-Олаште илыше, МВД да Госпожнадзорын почётан ветеранже, отставкысе подполковник Иван Иванов конден. Икымше снимкыште кодшо курымын колымшо ийла тӱҥалтыштыже пожар ваштареш кучедалаш ыштыме Краснококшайск оласе имне-печке ӱштыганын (обоз) еҥже-влак, а весыштыже Краснококшайскысе пожарный часть ончыкталтыныт.
Марий Элын Тулсорлык службыжо Совнарком Председатель В.И.Ленинын «Тул дене кучедалме кугыжаныш мерым ыштыме нерген» декретышке кидпалыжым пыштымеке ышталтын. Тиде 1918 ий 17 апрельыште лийын. Тений ты событийлан 100 ий темын. Ты декрет пожар ваштареш кучедалме пашам кугыжаныш кӱкшытыш нӧлталаш полшен да тудлан умбакыже вияҥаш негызым ыштен.
Революций деч ончыч Марий кундем тӱрлӧ уезд ден губернийыш пурен, сандене пожар ваштареш кучедалме шотышто нелылык лийын. Автономийым ыштымеке гына тулсорлык паша вияҥаш тӱҥалын. 1921 ий кеҥеж тӱҥалтыште Краснококшайскыште Марий областной комитетын икымше заседанийыштыже Коммунальный пӧлка пелен тулсорлык пӧлкам ышташ палемденыт. Тудым В.Г.Павловлан вуйлаташ ӱшаненыт, а инструкторлан С.С.Ганшиным налыныт. Краснококшайск пожар ӱштыганым тыгай состав дене пеҥгыдемденыт: брандмейстер — С.Г.Анциферов, полышкалышыже — И.Д.Федяков, кугурак пожарный-влак — В.Е.Степанов, Д.С.Печенников, боец-влак (умбакыже — тулпатыр) — таза кап-кылан 15 рвезе. Тулсорлык команде оласе Садовый уремыште, парк воктен улшо депошто, верланен.
Империалист да граждан сар жапыште пожар ӱштыганын ӱзгарже ачалалтын да у дене пойдаралтын огыл. Улшыжымат шалатен, шолышт пытареныт. Яллаште ӱштыган верланыме сарайлат лунчыргеныт. Лийше пожар-влак кундемлан кугу эҥгекым конденыт. Тиде амал денак самырык автономийыште тулсорлык пашалан оксам утларак ойыраш тӱҥалыныт. 1926 ийыште пеҥгыдемдыме кумияш планыш Краснококшайск тулсорлык командыш 66 тулпатырым да 16 вуй имньым налаш палемдыме улмаш. Волков уремыште у пожарный депом чоҥаш тӱҥалыныт. Пожарный машинам налмымат планыш пуртеныт. Оршанке, Шернур, Марий Турек, Звенигово, У Торъял, Юрино и Морко кантонлаште тулсорлык профессионал команде-влакым ышташ палемденыт да инспектор должностьым пурташ тӱҥалыныт. Эн первый инспектор-влак коклаште С.А.Комаров, С.Д. Иванцов лийыныт.
Савыкташ С.Носова ямдылен.
