Волжский районысо Сотнур кыдалаш школышто патриотический воспитанийлан кугу вер ойыралтеш.
«Патриот» программе кышкарыште шуко да кугу паша эртаралтеш. Тушко тунемше-влак деч посна туныктышо коллективат кумылын ушна. Илалше, тыгак сарын ветеранже-влакым огыт мондо. Пагалымаш – эн ончылно. Идалык мучко сурт коклаштат тӱрлӧ сомылым ышташ полшат. Школышто «Бессмертный полк», «Обелиск дек корно», «Шарнымаш пырдыж», «Дом без одиночества» акций-влак илышыш шыҥдаралтыт.
Выпускник-влак элнан тӱрлӧ военный вузышкыжо тунемаш пурат, шинчымашым келгемдат.
Тунемше-влак тӱрлӧ таҥасымашлашке, конкурсыш, смотрлашке чолган ушнат. Мутлан, тиде тургымыштат самырык-влак коклаште эртаралтше республик кӱкшытан «Технология добра» конкурсышто финалыш логалыныт. Тудо «Доброволец России» всероссийский конкурсын региональный этапшылан шотлалтеш.
Волжский район ден Сотнур кыдалаш школын чапшым «Дорога к роднику» проект дене волонтёр «Самырык тукым» отрядын членже Глеб Александров арален да «Экологическое добровольчество» номинацийыште сеҥышыш лектын.
Юл кундем округышто «Победа» конкурс кая. Ты проектыш ушнышо «СОБР» военно-патриотический клуб Марий Элыште эн сай военно-патриотический ушем семын палемдалтын. Ты клуб дене ик гана веле огыл палдарыме. ОБЖ ден ОВС-ым туныктышо опытан О.Ивановын вуйлатымыж почеш военно-патриотический ушемын воспитанникше-влак район, республик да Россий кӱкшытын мероприятий, смотр да конкурслашке чолган ушнат, ойыртемалтыт.
Мутлан, тений военно-патриотический месячник эртыме жапыште, 17 январьыште, школышто «Идалыкын спортсменже – 2017» конкурс эртен. Тушко 1-11 класслаште тунемше кумылан кажне еҥ ушнен кертеш. Тидыже, спортсмен-влак талырак лийышт, сай кӱкшытым ончыктышт манын, кажне ийын эртаралтеш. 7 февральыште Отечествым аралышын кечыжлан «Щит России» военно-патриотический муро конкурс лийын. Шкешотан фестиваль «День Победы» муро дене почылтын. Жюри участник-шамычын артист койышыштым, кажне еҥын ойыртемжым ончен. Муро-влак тӱрлӧ лийыныт: весела, шӱлыкан, кушташ таратыше… Руслан Александровым, Максим Александровым да Николай Васильевым поснак палемдыман. Нуно «Русский парень» йоҥгалтарыме мурышт дене кумылым тарватеныт. Молымат мокталтыман гына. Санденак чыла участникым жюри фестиваль-конкурсын грамотшо дене палемден.
Тыгак 21 февральыште «Ача кертеш, эргыжат кертеш» мероприятийым изирак класслаште тунемше-влаклан эртареныт. Конкурс жапыште ача да эрге-влак киногеройыш, мушкетёрышкат савырненыт, куштеныт, муреныт, «пасушто миным кычалыныт»… Латкок конкурсышто команде-влак иктӧр наре очком погеныт гын, «Снайпер» спорт конкурс сеҥышым ойыраш полшен. «Виян-влак» команде ончыко лектын.
Ты кечынак «Рыцарский турнир» лийын. Тудым О.Иванов ямдылен. Виян да патыр улмыштым 5,6,7,8 класслаште тунемше рвезе-влак ончыктеныт. Самырык рыцарь-шамычлан шарнымашан пӧлекым кучыктен, вуй ӱмбалне канде кавам тыланеныт.
Военно-патриотический воспитаний месячник жапыште национальный культур, марий йӱла темымат ӧрдыжеш коден огытыл. «Мемнан культурна – мемнан историйна» пеҥгыдемденыт участник-влак, «Айста марла кушталтена» флешмобым эртареныт.
Верысе администраций вуйлатыше денат вашлиймашым эртарат. Тушто илышыште лекше кӱлешан йодышымат каҥашат. Тидыже самырык тукымын элнан политике илышыштыжат шинчымашыже лийшаш манын ышталтеш. Вет ончыкылыкна – тудын кидыште.
Салтак-влак сайын лӱйылтшаш улыт. Лӱйылтмӧ дене школын первенствыштыже Ольга Николаева ден Дмитрий Яковлев ойыртемалтыныт. Шахмат дене модмаште икымше верым Андрей Войконов налын.
Эн кугу кӱкшыт – военно-патриотический воспитаний месячник годым Глеб Александров ден Дмитрий Ушаковын Волжский районысо команде дене пырля призывник-влак коклаште эртаралтше республик кӱкшытан спартакиадыште выступатлымышт, сай результатым ончыктымышт. Команде чыла шотыштат ончыко лектын, икымше верым налын.
Теве тыге илат, тунемыт, тазалыкым пеҥгыдемдат, патриотизм шӱлышеш шуаралтыт Сотнур школысо тунемше-влак.
Ончылно – кугу пайрем, 9 май. Тидланат ӱдыр-рвезе-влак ончылгоч ямдылалтыт, чыла шотыштат чолгалыкым ончыктат.
Е.Эшкинина.
Снимкыште: таҥасыме тат.
Фото: Сервер/ Эшкинина/ sobr-4
Пырля шыргыжалза