17 февральыште Марий Эл Образований да науко министерствын, кучемын пашеҥже-шамыч, тенийсе выпускник-влакын ача-авашт обществознаний дене ЕГЭ-м кучат. Нунын коклаште Марий Элын образований да науко министрже Н.Адамова, республикын правительстве председательын икымше алмаштышыже М.Васютин лийыт. Экзамен Ломоносов лӱмеш лицейыште эрта.
А всероссийский акций 19 февральыште Крымыште тӱҥалеш. 19 гыч 21 февраль марте ты мероприятийыш Российысе 50 субъект ушна. Ача-ава деч посна экзаменым журналистат кучен кертеш. Шке шинча денак ЕГЭ-шке пурымо годым регистраций кузе эртымым, экзаменысе аудиторийыште контрольно-измерительный материалым печатлен лукмым ужаш лиеш. Пелен паспортым, шем тӱсан гелевый ручкам налман. Акцийыш ушнаш кумылан ача-ава-влак йодмашым pankova.gp@mon.mari.ru электрон почтыш колтышаш улыт.
Л.ШАБДАРОВА.
