Марий Эл Республикыште Кресаньык фермер озанлык да ялозанлык кооператив-влакын ассоциацийыштым ыштыме.
17 январьыште Марий Элын кресаньык фермер озанлыкше ден ялозанлык кооперативше-влак Агробизнес кадрым угыч ямдылыме Марий институтышто Ассоциацийын советшын заседанийышкыже погыненыт. Тушто Кресаньык фермер озанлык да ялозанлык кооператив-влакын ассоциацийыштым ыштыме шотышто учредитлыме документ-влакым приниматленыт, председательлан кресаньык озанлыкым вуйлатыше Григорий Александрович Петров-Чоткарым сайленыт.
Тиде ассоциацийыш 34 кресаньык фермер озанлык да ик ялозанлык коопреатив ушненыт. Нуно чыланат тӱҥ шотышто шӧрым ямдылыме да ялозанлык вольыклан кормам ситарыме пашам шуктат. Коклаштышт мӱкшым, пакчасаскам ончышо-шамычат улыт.
Ассоциацийым вуйлатыше Г.Петров-Чоткарын озанлыкше У Торъял районышто верланен. Тудын ялозанлык кушкылым ончен кушташ 1000 гектар курал-ӱдымӧ мландыже уло. Тыгак 100 наре вуй тӱкан шолдыра вольыкым ончат, ты шотыштак – 34 ушкалым. Озанлыкын тӱҥ пашаже – шӧрым ямдылымаш.
Кресаньык фермер озанлык да ялозанлык кооператив-влакын ассоциацийыштым ыштыме дене заседанийын участникше-влакым Марий Эл Республикын ялозанлык да продовольствий министржым алмаштыше Андрей Кондратенко саламлен да регионысо тиде секторым ончыкыжымат вияҥден колтымаште сеҥымашым тыланен.
Ялозанлык да продовольствий министерствын специалистше-шамыч изи форман озанлык-вуйлатыше-влакым таче кечылан пӱсын шогышо да кӱлешан йодыш-влак дене палдареныт, кугыжаныш полышым, грантым, льготан кредитым налме йӧн-влак нерген каласкаленыт. Тыгак шошо агам эртарен колтымо, материально-технический ресурсым ситарыме нерген мутланеныт.
Кресаньык фермер озанлык да ялозанлык кооператив-влакын ассоциацийыштын заседанийыштышт Марий Эл Республик Кугыжаныш Погынын Аграрный комитетшын председательже Аркадий Новиков ден Агробизнес кадрым угыч ямдылыме Марий институтын ректоржо Юрий Новосёлов лийыныт.
М.ИВАНОВА.
