Тыйын шочшет, марий калык
Волгенче гай писе спортсмен
Февральыште Пермь олаште самбо дене тӱнямбал классан спорт мастер Лев Паркачёвым шарнымылан пӧлеклалтше самбо дене почылтмо командный турнир эртен.
Тиде чолга марий спортсмен 1964 ий 11 майыште Пермь областьыште Гремячинский район Шумихинский поселкышто шуко шочшан ешыште шочын. Верысе школышто кандаш классым тунеммеке, рвезе Пермь оласе 30-шо №-ан профессионально-технический училищыш тунемаш пурен, спорт дене пеҥгыде кылым кучен.
Ссуз деч вара тудым армийыш налыныт. Лев Михайлович Урал военный округышто армийын спортклубыштыжо служитлен. 1982 ийыште самбо дене РСФСР-ын чемпионатыштыже кокымшо верым налын да СССР спорт мастерын норматившым шуктен.
1986 ий 30 июньышто тӱнямбал классан спорт мастер званийым налын, варажым «СССР спорт мастер» почетан знак дене палемдалтын. Паркачев Совет Союзын сборныйышкыжо пурен. Йолташыже-влак коклаште кугу пагалымашым сулен.
Лев Михайлович РСФСР-ын чемпионжо лӱмым кок гана, самбо дене кучедалмаште Совет Союзын призержо 4 гана лийын. 1986 ийыште Калинин олаште эртыше тӱнямбал турнирыште чемпион лӱмым налын. 1987 ийыште тудо Мароккошто эртыше тӱнямбал кубокышто сеҥышыш лектын. Тудо ятыр медаль, диплом, грамотдене палемдалтын. Родо-тукымжо тачат нуным переген аралат. Спортсменын ӱмыржӧ 1990 ий 18 февральыште кӱрылтын. Лӱмлӧ самбистлан пӧлеклалтше турнир Пермь олаште 2002 ий гыч эртаралтеш.
Тений турнирыш 2002-2003 ийлаште шочшо рвезе-влак ушненыт. Соревнований И.Пономарев лӱмеш «Витязь» спортшколышто эртен. Турнирыш толшо уна-влак Лев Михайлович нерген ятыр поро мутым каласеныт. Тудо спортышто кугу кӱкшытыш шуын. Туге гынат шкеж верч гына тыршен огыл, родо-тукымжыланат полшен. Кызыт тудын пашажым Леонид шольыжо да тукым уныкаже Матвей Сычев шуят.
Леонид изаж семынак самбо дене таҥлалтын. Тудо ятыр гана сеҥышыш лектын: 2006 ийыште Ташкентыште – 2-шо вер, 2007 ийыште Грецийыште – 1-ше вер, 2010 ийыште Прагыште – 2-шо вер, 2011 ийыште Грецийыште – 2-шо вер. Леонид Пермь кундемысе марий рӱдерын чолга еҥже. Тудо X Марий Погынын делегатше лийын.
Спортсмен-влакын ачашт Михаил Тихонович Удмуртийыште Карагӧл район Быргында ялыште шочын, шахтерлан пашам ыштен, а аваже, Тамара Николаевна, Татарстанысе Агрыз район Кӱанэҥер ялыште шочын, туныктышо лийын. Тамара Николаевнан Валентина акаже Татарстанысе марий-влакын национально-культурный автономийыштым вуйлатыше Олег Третьяковын аваже. А нунын авашт, Ксенья Степановна — Микай Герасимовын шӱжарже. Лев Михайовичын Максим эргыже Пермь олаште ила да пашам ышта.
— Лёва спортыш волгенче семын писын чоҥештен пурен. Тыгай кӱчык жапыште тудо моткоч шуко пашам ыштен, кӱкшӧ тошкалтыш дене кӱзен шуктен. Лачак ӱмыржӧ моткоч кӱчык лийын. Санденак тудын нерген поро шарнымаш шӱмыштына эре илаш тӱҥалеш. Тек самырык спортсмен-шамычат тудын кӱкшытышкыжӧ шуаш тыршат, — каласен тудын пелашыже Людмила Михайловна.
Р.ПОПОВА, Пермь оласе Марий национально-культурный рӱдерын председательже.
(Фотом Паркачевмытын еш альбомышт гыч налме.)
Снимкылаште: Лев Паркачевын черетан кугу сеҥымашыже.
