14-22 октябрьыште Сочи олаште Самырык ден студент-влакын тӱнямбал фестивальышт эрта. Марий Эл гыч тушко 125 участник ден 40 волонтер каен. Чылаже фестивальыш 150 эл гыч 20000 ӱдыр-рвезе чумырген.
Фестивальыш кугу уна-влак, кумдан палыме оратор Ник Вуйчич, пӱртӱсым аралыме тӱнямбал фондын генеральный директоржо Марко Ламбертини, Google Интернет ресурсын внешний политикыже шотышто директор Авни Дорон, писатель Фредерик Бегбедер, ФИФА-н генеральный секретарьже Самуру Фатму, ӱдыр-рвезе-влаклан оҥай лекцийым лудыт, вашлиймашым эртарат.
Самырык-шамычым тыгак поян тӱвыра ден спорт мероприятий-влак вучат. Тиде фестивальыште волонтёр-влакын ик эн кугу корпусышт (67 эл гыч 5000 еҥ) пашам ышташ тӱҥалеш.
10 октябрьыште Самырык ден студент-влакын тӱнямбал фестивальыш делегацийым ямдылыме региональный комитетын заседанийже эртен. Тудым Марий Эл Правительстве председательын икымше алмаштышыже, Тӱвыра, печать да калык-влакын пашашт шотышто министр М.Васютин вӱден.
Республикын Образований да науко министрже Н.Адамова делегацийын ямде улмыжым пеҥгыдемден каласен. Нунылан «Марий Эл» символикан футболкым, толстовкым ямдыленыт. Таче кечылан Сочи олаште республик дене палдарыше стенд пашам ышта. А волонтерна-влак фестивальыш эше 7 октябрьыштак кудалыныт.
12 октябрьыште 125 еҥан делегацийнам Ленин лӱмеш площадь гыч торжественно ужатеныт. Нуным Марий Элын тӱҥ федеральный инспекторжо П.Журавлёв, Марий Эл Правительстве председательын икымше алмаштышыже,
М.Васютин, МарГУ-н ректоржо М.Швецов, молат саламленыт, ятыр поро тыланымашым ойленыт, республикнам фестивальыште сайын почын ончыкташ, пиалан корным тыланеныт.
Эрдене игече юалге ыле, но кече кӱшыч шыратен ончен, ӱдыр-рвезе-шамычын чурийвылышыштышт куан тул шижалтын. Нуно икте-весе дене кумыл нӧлтын мутланеныт, Марий Элысе йолташышт дене шокшын чеверласеныт.
Л.ШАБДАРОВА
