Изарнян правительстве пӧртыштӧ республикын Антитеррористический комиссийжын заседанийже эртыш. Тудым республик вуйлатышын пашажым шуктышо Александр Евстифеев вӱдыш.
Икмыняр министерстве, муниципал образований вуйлатыше, силовой структур-влакын еҥышт терроризм, экстремизм койыш палдырныме, еҥ-влакым тыгайыш ушымо ваштареш кучедалме шотышто мо ышталтме да эше мом ышташ лийме нерген мутланышт. Погынышо-влак транспорт лӱдыкшыдымылык йодышым каҥашышт, республикысе тунемме верлаште терроризм ваштареш профилактикым эртараш кӱлмылан кугу тӱткышым ойыраш кӱлмӧ нерген ойлышт.
Студент ден тунемше-влакын лӱдыкшыдымылыкышт шотышто Марий Элын образований да науко министрже Наталья Адамова МВД ден тӱвыра, печать да калык-влакын пашашт шотышто министерствын ятыр пашам пырля эртарымышт нерген каласкалыш. Йот элла гыч студент-влак дене, а нуныжо республикыште 2000 нарын улыт, экстремизм ваштареш кучедалме шотышто поснак кугу паша эртаралтеш манын палдарыш.
Александр Евстифеев заседанийыште тарватыме йодышын моткочак кӱлешан улмыжым палемдыш да терроризм ден экстремизм ваштареш кучедалме эн сай йӧн – профилактике мане. Тыгак тудо Центральный Азий ден Ближний Восток гыч студент-влакын социальный да культурный адаптацийышт шотышто вузлаште профилактике пашам эртарыме йодышеш поснак шогале. Александр Александрович йот элла гыч студент-влакым удан тунеммыштлан огыл, а шкеныштым келшен толдымын кучымыштлан вуз гыч луктын колтымо случай лийме нерген йодо. Лийын, 5 студентым луктын колтеныт манын каласышт.
А.Евстифеев тыгак Интернетлан эҥертен, самырык-влак коклаште терроризм идеологий ваштареш кучедалме шотышто могай паша шукталтме нерген йодо.
— Сайт-влак дене пашам ыштымаш профессионально да легально эртаралтшаш. Нине йодыш-влакым шотыш налза, — образований да науко министрлан каласыш Александр Евстифеев.
Интернетыште социальный кыллаште шкем шке пытараш таратыше модыш-влак шукеммым шотыш налын, самырык-влак коклаште терроризм ваштареш кучедалме пашам Интернет гоч эртарымаш — эн тӱҥ направлений. Александр Евтифеев ты шотышто паша ончылтенат ышталшаш манын палемдыш да терроризм, экстремизм шонымашан материал ден увер-влакым шаркалыше-влакым пален налшашлан, пашаштым чарышашлан Интернетыште сайт-влакын мониторингыштын пайдашт кугурак лийже манын, ешартыш мерым ышташ кӱлмӧ нерген мондыман огыл манын каласыш.
Любовь Камалетдинова.
