27 июньышто, Россий самырык-влак кечын, Мер-политик рӱдерыште Марий самырык тукымын 4 -10 июльышто эртышаш черетан индешымше слётшылан пӧлеклалтше погынымаш лийын.
Тудым эртарыме годым Марий Эл Республикыште Айдемын праваже шотышто уполномоченный Лариса Николаевна Яковлева самырык-влак дене пашам ыштыше мер пашаште тыршыше-шамычым шукерте огыл шогалтыме тӱҥ федеральный инспектор Петр Николаевич Журавлёв дене палдарыш.
Марий Эл Республикысе йоча ден ийготыш шудымо-влакын «Эр Вий» мер организацийыштым вуйлатыше Маргарита Михайловна Маланова шушаш слётын паша планже нерген каласкалыш. Тений тудо Килемар районысо Арде профессионально-технический техникумышто эрта.
Марий Элын тӱрлӧ районлаже, пошкудо Татарстан ден Башкортостан Республик, Киров область гыч слетыш погынышо 60 ӱдыр-рвезе да 10 организатор тений 8 июньышто эртаралтше «Кугезе мланде» фестивальыште марий калык йӱла дене палыме лийын кертыт. «Раздолье» турист комплексыште «йыргешке ӱстел» йыр погынат, I Марий калык погын инсценировкым ончыктат да шке бизнес проектышт дене палдарат.
Мутат уке, погынышо-влак утларак тӱткышым самырык-влакын чолгалыкым ончыктымыштлан ойыраш кӱлмӧ шотышто ик ойыш шуыныт да вес ийын шушаш X Марий самырык юбилейный слётым кузерак эртараш кӱлмӧ, тушко утларак чолга ӱдыр-рвезе-влакым чумырымо да тидлан шийвундо ситарыме йодышым каҥашеныт.
Е.Садовин.
Р.Николаеван фотожо.