Фотошто ончыктымо тошкалтыш могай пашалан ышталтын, шонеда? Тунемаш!
Ӱмаште пандемий тӱҥалме дене, дистанционно тунемме йӧныш куснымеке, Йошар-Ола деч 150 километр торасе Эшполдо велне (Шернур район Кукнур кундемышт пура) йоча-влак лач тыге, 3-4 метр кӱкшытыш кӱзен, интернетым «кычалыныт». Эшеже верысе озанлыкын гараж ӱмбакыже кӱзен толашеныт. Ӧрмаш, но тиде чын. А вет эн ончычак кугу нелылыкыш туныктышо ден тунемше да ача-ава-влак логылыныт. Куш пурет? Южышт шергакан модемым налаш тыршеныт, а кӧн йӧнжӧ уке гын?
Ты кундемыште шинчымашым нӧлташ веле огыл, шахмат денат модаш кумылан тале ӱдыр-рвезе-влакат улыт. Нунышт эсогыл дистанционно тунемме жапыште республикысе турнирыш ушненыт да сеҥыше радамыш лектыныт.
Тунам Кукнур ял шотан илемым вуйлатыше Л.Долгушев «Ростелекомын» Марий Элысе филиалжым вуйлатыше С.Пашукова лӱмеш серышым возен. Вашмут писын толын – окса уке, кеч тиде йодышын пӱсылыкшым нунат умылат. Но верысе-влакым вуйым сакен огытыл, ындыжым ача-ава лӱм дене тудланак да эше Марий Эл Кугыжаныш Погын депутат В.Кожановлан возеныт. Ий верже гыч тарванен – кеҥежым Лари марте кабельым шупшыныт гын, кызыт, тиде арня тӱҥалтыште, ынде уремлашке шуяш, меҥгым шогалтылаш тӱҥалыныт.
Киров область дене чекыште верланыше вич ялыште – Кадрачыште, Куэрыште, Лариште, Мекеште, Осканыште – чылаже 323 еҥ ила, тушеч 27-ше – Кукнур школын тунемшыже. Ынде нунат кумда интернетвотыш куштылгын ушнен, шинчымашым келгемден, тӱням шымлен кертыт. Леонид Семенович ты пашам тарватен мошымылан туныктышо ден ача-ава-влаклан, район администрацийым вуйлатыше А.Кугергинлан, депутат В.Кожановлан да «Ростелекомын» Марий Элысе филиалжым вуйлатыше С.Пашуковалан таушта.
А школ директор С.Конаковын палемдымыж почеш, нуно кызытат кас еда кок шагат интернет гоч шахматла модыт. Ӱшанена, Меке гыч тунемшын, ӱшаным пуышо шахматистынат, суртышкыжак лишыл жапыште интернет пура.
С.Пехметова
