1 декабрь гыч врач-влак коронавирус дене пашам ыштымыштлан ешартыш выплатым тӱлымӧ шотышто электрон вуйшиймашым пуэн кертыт, электрон больничныйым налашлан ешартыш документ кӱлеш, а льготник-шамычлан, тиде праваштым пеҥгыдемдыде, кӱртньыгорно транспортыш билетым тора гыч налаш йӧн лиеш.
Огыт тӱлӧ – вуйым ший
Коронавирус дене кучедалше медицине персонал пашажлан ешартыш выплатым огеш нал, але тудым тичмашын огыл, тыгак вараш кодын тӱлат гын, 1 декабрь гыч электрон вуйшиймашым пуэн кертеш. Тидым Кугыжаныш услуго портал але Социальный страхований фондын официальный сайтше полшымо дене личный кабинет гоч ышташ лиеш.
Ушештарена, Россий правительствын пунчалже дене келшышын, COVID-19 дене кучедалше медпашаеҥ-влак кажне нормативный сменыштлан 2020 ий ноябрь тӱҥалтыш гыч декабрь мучаш марте выплатым налшаш улыт. Тиде радамыш военный але тудын дене тӧремдыме службылаште улшо врач-шамычым пуртымо огыл.
Нормативный сменылан ик арнясе паша жапын визымше ужашыже шотлалтеш. «Вашкеполыш» службын верлашке кудалыштше бригадыштыже пашам ыштыше врач, кокла да изирак медпашаеҥ-влаклан ик нормативный сменыштлан 2430, 1215 да 950 теҥге дене палемдалтеш. Черле деке ӱжшӧ еҥ дене мутланыше да тидым «вашкеполыш» бригадылан увертарыше фельдшер ден медсестра-шамычлан – ик нормативный сменыштлан 600 теҥге дене.
СНИЛС кӱлеш
14 декабрь гыч Российыште пашам ыштен кертдыме лаштыкым (больничный лист) пуымо радам весемеш. Ик эн тӱҥ вашталтыш – документым цифровой вид дене оформитлыме годым личностьым пеҥгыдемдыше документ деч посна эше СНИЛС кӱлеш. У правил дене келшышын, южо еҥлан пашам ыштен кертдыме лаштык кагаз форматыште гына пуалтеш.
Льготан билет
1 декабрь гыч льготник-влак, тиде праваштым пеҥгыдемдыме, кӱртньыгорно транспортыш билетым тора гыч налын кертыт. Ынде тиде пашам оператор шкеак шукта: пассажирын кӱлешан данныйже-влакым федеральный увер системе гоч налеш.
Тылеч посна билетым интернет гоч ужалыше инфраструктурын озаже але перевозчик шкежак гражданинлан налме билетшым Кугыжаныш услуго портал гоч пуаш йӧным ыштышаш улыт. Билет дене пайдаланыдыме годым документын озаже оксам тиде сервис полшымо денак пӧртылтен кертеш.
Тиде кечынак Кугыжаныш услуго портал дене кылдалтше эше ик вашталтыш вийыш пура – гражданинын келшымыж почеш, нуно портал гоч тудын социальный аралтыш да полыш мере, социальный услуго да гарантий дене пайдаланен кертмыж нерген уверым налын кертыт. Тыгодым тиде данный персонифицироватлыме (кажне еҥлан посна ямдылыме) лиеш.
Цифровой нотариат
Тений 29 декабрь гыч нотариус-влакын тора гыч шуктымо пашашт дене кылдалтше нотариат нерген законодательствыш пуртымо вашталтыш-шамыч вийым налыт. Тудын дене келшышын, сделкым кок але утларак нотариусым ушен ышташ йӧн лиеш. Тидыже, нотариус деке мийыде, сделкыште иканаште икмыняр еҥын участвоватлымыж, тыгак иктажшын нотариус деке лично миен кертдымыж годым кӱлеш лийын кертеш.
Тылеч посна, тора гыч ыштыме нотариальный паша шотышто специальный реестр лиеш. Тушко кок да утларак нотариусым ушен эртарыме сделкат пурталтеш. Тыгодым нотариальный документ келшыше «кагаз» документыште лиеш.
Шӧртньӧ але?..
1 декабрь гыч ювелир арверым тестовый режимыште маркироватлыме системе пашам ышташ тӱҥалеш: палемдыме системыште личный кабинетым почаш да маркировкым шке кумыл негызеш эртараш йӧн лиеш.
Тиде системе калыкым шояк сатум налме деч аралаш кӱлеш – маркировко полшымо дене арверым мо гыч ямдылыме да тудын физико-химический характеристикыж нерген тичмаш уверым пален налаш лиеш.
М.ИВАНОВА ямдылен
