ХI Марий калык погынышто кызыт Петрозаводскышто илыше да пашам ыштыше Шернур марий ӱдыр Алевтина Войтовичлан Марий Элын 100 ияш лӱмгечыжлан палемдыме мер да политик пашаеҥ, Марий облисполкомын икымше председательже И.П.Петров лӱмеш «Калык верч тыршымаш» шарнымаш медальым кучыктышт.
Алевтина ынде ятыр ий Карел кундемыште ила да А.Глазунов лӱмеш Петрозаводскысо кугыжаныш консерваторийын Финн-угор калык-влакын музык кафедрыштыже этномузыковед семын пашам ышта. Шке жапыштыже тудо, И.Палантай лӱмеш музыкальный училищым пытарымеке, тусо консерваторийыш тунемаш каен. А тунем лекмеке, тышанак пашам ышташ кодын. 2006 ийыште «Акрет мари» фольклор ансамбльым чумырен. Участникше-влак тӱрлӧ марий семӱзгар дене шоктат, мурат да куштат. Алевтина «Карелийысе марий-влак» мер ушемын чолга еҥже. А 2018 ийыште «Шулдыр» лӱман вес ансамбльым чумырен. Тудыжо финн-угор калык-влакын тӱвырашт
дене палдара. Кок ансамбльжынат участникше-влак консерваторийынак студентше-влак улыт. Каласен кодыман, кок ансамбльжат тӱрлӧ конкурсышто, фестивальыште участвоватлат да эре гаяк ойыртемалитыт. Алевтинан ойлымыж почеш, кызыт «Акрет мари» ансамбльжын участницыже-влак чылан гаяк йоча дене шинчат, сандене коллектив ик татлан шке пашажым чарен.
Алевитн,а наградым налмеке, соукылысе шкенжын лаштыкыштыже серен: «Тиде уло Карелийысе марий калыкын пашажым аклыме награда. Пеш кугу тау, пагалымем-влак, пырля лиймыланда, ик шонымаш да ик ой ден кугу Мер пашам вияҥгдымыланда!»
Каласен кодыман, Тений «Крелийысе марий-влак» организаций 10 ияш лӱмгечыжым палемда. Тудым Михаил Асессоров вуйлата, а исполкомжым — Алевтина Войтович.
С.НОСОВА
Фотом ВКонтакте соцкыл лаштык гыч налме
