Марий Эл вуйлатыше Александр Евстифеев правительстве пӧртыштӧ совещанийым эртарен. Тушто республикын экономикышкыже инвестицийым кондымо йодышым каҥашеныт.
Совещанийын пашашкыже «Флагман» Волжскысо судоходный компаний» ООО-н генеральный директоржо Сергей Денисов ден «Нижегородская ярмарка» ЗАО-н генеральный директоржын советникше Валерий Барулин ушненыт.
Нине инвестор-влакын ик темлымашышт Юл гоч перевозкым ыштыме дене кылдалтын. Валерий Барулинын палдарымыж почеш, компанийын налме судныштым ончыкыжым Юрино поселко ден Курыкмарий район Сумка селашке кошташ паром вончыштарымаш (переправа) семын кучылташ лиеш. Викше нунын коклаште — улыжат 4 километр. Тыгак тиде компаний водоём-влакын серышт ден пундашыштым эрыктыме шотышто проектым шукташ ямде.
— Копорулиха – Юрино – республиканский корно. Вес ийын ме тудым олмыкташ тӱҥалына. Кок ий жапыште корным шотыш конден шуктышаш улына. Тидыже ончыкыжым турист-шамычым Юрино районыш толаш кумылаҥден кертеш. Шереметев замокым олмыктымат тидлан полшышаш. Сандене кызыт каҥашыме маршрут тӱрлӧ тӱшка калыклан кӱлешан манын, эше ик амал семын тидат пеҥгыдемда.
Александр Евстифеев ешарен: районыш инвестицийым кондымаш илыме верлашке газымат писынрак пурташ полшышаш.
Марий Эл вуйлатышын организаций
да аналитике виктемжын уверже негызеш
Л.КАМАЛЕТДИНОВА ямдылен.
