Россий Пенсий фондын Йошкар-Оласе виктемыштыже Марий Элыште у коронавирус инфекций дене ончыл линийыште кучедалше медик-влакын спецстажыштым у семын шотлен лукмо радам дене палдареныт.
Палемдыме медицине пашаеҥ-шамычын стажыштым шотлымо годым пашам пуышо РФ правительствын у правил-шамыч нерген пунчалжым шотыш налшаш.
Документ дене келшышын, спецстажым тыгай радам дене шотлыман:
— медикын стационар условийысе ик паша кечыжым – кокыт семын;
— ОРВИ да пневмоний палан черлылан вашкеполышым, специализироватлыме да медицине полышым пуышо, ты шотыштак COVID-19 дене черланен кертше пациентын биоматериалжым лабораторийыште шымлашлан налше, тыгак у коронавирус инфекций дене черланен кертын манын шонымо пациентым эвакуироватлыше медицине пашаеҥ-влакын ик паша кечыштым — кокыт семын;
— пеҥгыдемдыме у коронавирус инфекциян, тыгак ОРВИ да пневмоний палан пациент-влаклан амбулаторий условийыште (ты шотыштак — мӧҥгыштӧ) первичный медико-санитарный полышым пуышо, COVID-19 дене инфицироватлалтын кертше-шамычын биоматериалыштым лабораторийыште шымлашлан налше, пневмоний дене черланен кертше пациентым КТ-рӱдер дене шыҥдарыме поликлинический отделенийыш але вес медицине организацийыш шымлаш кондыштарыше медикын ик паша кечыжым – кокыт семын.
Тыгай паша 2020 ий 1 январь гыч 30 сентябрь марте шотыш налалтеш.
М.ИВАНОВА
