Республиканский психиатрический больницын пашаеҥже пел миллион наре теҥге оксам шканже налын.
ФСБ-н республикысе управленийжын пресс-службыжын увертарымыж почеш, ты эмлымверыште тыршыше ӱдырамаш тушто пашам ыштыдыме еҥ-влакым пашам ыштышылан шотлен да кок ий, 2017 гыч 2019 ий марте, банк картышкышт оксам колтылын. Мо оҥайже, нунын картышт тудын дене лийыныт. Тыге ӱдырамаш психбольницылан бюджет гыч ойыралтше 450 наре тӱжем теҥге оксам шканже налын.
Следствий кайыме жапыште тудо 150 тӱжем теҥгежым пӧртылтен.
Йошкар-Оласе суд тудым титаканлан шотлен да кок ий испытательный срок дене ныл ийлан условно эрык деч посна кодаш, тыгак 300 тӱжем наре теҥгем пӧртылтыкташ пунчалым луктын.
Л.КАМАЛЕТДИНОВА
