Кодшо кечылаште Чавайн бульвар гоч ошкыл эрташ логале. «Шукертак лийын омыл. Фонтаныште вӱдын модмыжым, клумбышто сылне деч сылне пеледышын тӱзланымыжым ончалам», — эше тарванымем годымак куанен шоналтышым. Но йоҥылыш лийынам улмаш…
Бульварыш Карл Маркс урем гыч пурышым. Изи фонтаным «Водоканал» МУП-ын пашаеҥже-влак мушкыт ыле. А кугужо пашам ышта – кӱшкӧ нӧлталтше вӱд тора гычак коеш. Фонтаным шотышто кучат, жапыштыже эрыктат – сай паша. Но клумбыж дене мо лийын?! Йошкар-Олаште 30 наре ий илымем жапыште тыгай шучко сӱретым иканат ужын омыл: клумбышто сылне деч сылне кушкыл тӱзланыме олмеш коншудо ден чывышудо (вӱдшудо) озаланат! Ола кыдалне! Тӱткынрак ончалаш гын, шӱкшудо коклаште (йымалне манаш утларак келшен толеш, очыни) «пыкше шӱлышӧ» петунийым, виолым (кишкышинча) да монь ужаш лиеш… Но нуным поснак чывышудо «темдалын». А икмыняр клумбым содыки сомыленыт! Нугыдын да кӱкшын кушшо шӱкшудым кӱрмышт годым сальвийымат солалтеныт, йошкар вуйжо, ужар лышташыж деч посна коденыт. Нуныжо ынде мыскыньын веле койын шогат. Петунийым шындыме ик клумбымат сомыленыт, но варашрак кодын: шӱкшудын ӱмылтымыжлан кӧра сылне кушкыл лунчырий лийын. Коншудо да чывышудо деч утлымыж деч вара тырла да вияҥеш гын веле? Йора, кеч сомыленыт… Ынде ончалашат каньыле. А моло клумбым кунам шотыш кондат?
Сайынрак ончалаш гын, клумбыш пеш сылне пеледыш росотам эсогыл радамым шотыш налын, шкешотан узорым келыштарен шындыме. Но шӱкшудыжым молан жапыштыже кӱрмӧ огыл? Тидлан кӧра бульварым сӧрастарыше кушкыл вийым налын кертын огыл, шукыжо пытенат. Окса гына вӱдыш каен…
2020 ий – Шарнымаш да чап идалык, тыгак Марий Эллан 100 ий темеш. Чыла тидым шотыш налын, Марий кундемнан рӱдолажым палынак сайын тӱзатат манын шоненам ыле… А кызыт ветеран-влак ончылнат, ӧрдыж кундем гыч толшо уна-шамыч ончылнат, турист тӱшка ончылнат просто намыс. Клумбым кеч шке шогалын тӱзате, олаште оза уке гын…
М.ИВАНОВА
Авторын фотожо
