27 июньышто «Идалыкын этноблогерже» конкурс иктешлалтын.
Мероприятийыш 14 регион гыч этно сынан интернет лаштыкым вудышӧ-влак ушненыт. «Чылаже 23 йодмаш пурен», — палемден «Интеллектуал» коммерческий огыл организацийын вуйлатышыже Эльвира Куклина.
«Самырык этноблогер» номинацийыште Звенигово район Красногорский школышто тунемше Мария Зверьева сеҥен. Ӱдыр конкурс нерген марий йылме, ИКН туныктышыжо дечын пален налын да ушнаш кумылаҥын. Тудо шочмо кундем, верысе легенде, марий патыр-влак дене шке инстаграм лаштыкыштыже палдара.
«Идалыкысе пост» номинацийыште икымше верыш Москосо грек ушемыште тыршыше Елена Топузова лектын.
«Идалыкысе блог» номинацийыште Татарстан кундемын уста рвезыже Олег Давыдов ойыртемалтын.
«Идалыкысе этноблогер» лӱмым Евгения Кошкина сулен налын. Евгения этнодизайнер семын кумдан палыме. Тудо интернет лаштыклашкыже шке кид дене ыштыме сылне вургемым, мотор сӧрастарыме ӱзгарым ончаш луктеш.
Кажне участниклан пӧлекым кучыктеныт. Сеҥыше-влак диплом, кубок дене палемдалтыныт. Тыгак нунылан марий кундемын тӱрлӧ лукышкыжо миен толаш сертификатым кучыктеныт.
О.МОШКИНА
