Марий Элын Тазалыкым аралыме министерствыже «Марийскгражданпроект-Базовый территориальный проектный институт» АО дене вертолёт шичме площадкым чоҥашлан контрактым ыштен.
Вертолёт площадке Йошкар-Оласе больнице деч тораште огыл, Медицинский уремыште, лиеш. Санитарный авиаций дене экстренный медицине полыш кӱлмӧ годым пайдаланаш тӱҥалыт.
Площадкым чоҥашлан регионысо Минздравлан республикын бюджетше гыч 1,85 млн. теҥгем колтымо. Чыла пашам мучаш марте шукташлан да оборудованийым налашлан чылаже 15 млн. теҥгем ойыраш палемдыме.
Вертолёт площадкым 2020 ий декабрь марте чоҥен шуктышаш улыт.
М.ИВАНОВА
