Простажак огыл эпидемий сӱретым шотыш налын, Марий Элыште 8 июньышто Социальный пашаеҥын кечыжым дистанционно эртареныт.
Социальный аралымаш системын пашаеҥже-шамыч «Мый социальный пашаеҥ улам, молан манаш гын…» лӱман челленджыш ушненыт. Шке видеоштышт нуно икте-весыштым пайрем дене шокшын саламленыт, профессийыш толмо корнышт дене палдареныт. Челленджыш ончымо еҥышт дене пырля самоизоляцийыште улшо коллегыштат ушненыт.
Марий Элын социальный аралымаш системыштыже 65 кугыжаныш тӧнеж пашам ышта. Нуно посна категорийыш пурышо граждан-влаклан вид да формо шот дене тӱрлӧ услугым, ты шотыштак социально-медицинский, социально-бытовой, социально-психологический да моло услугым, пуат.
Регионыштына калыкым социально обслуживатлыме сферыш кугыжаныш огыл организаций-влакымат ушат. Таче кум тыгай организаций инвалид йоча-шамычлан реабилитаций услугым пуа.
Республикыште илыше 250 тӱжем утла еҥ социальный аралымаш органла гоч социально полшымо 60 наре тӱрлӧ мерым чылаже 3 млрд. утла теҥгелан ий еда налеш.
Таче Марий Элын социальный аралымаш органлаштыже 3 тӱжем утла еҥ пашам ышта. Нуно пособийым, субсидийым да компенсацийым палемдат да жапыштыже тӱлат, граждан-влакым тӱрлӧ йодыш дене приниматлат да калыкым социально обслуживатлат.
М.ИВАНОВА
