Кугу Отечественный сарыште сеҥымылан 75 ий теммым тений неле чер эпидемийлан верч чыла вере ойыртемалтшын палемденыт гынат, ты дате денак кылдалтше шарныктыш-влакым олмыктен, уэмдыме паша республикыште чарнен огыл. Тидлан пытартыш ийлаште «Тачысе илышлан келшен толшо оласе кумдыкым тӱзатымаш» федеральный программат сайын полша.
Пытартыш ийлаште тыгай воинский мемориалым районлаште шагал огыл нӧлтымӧ. Теве Шернур посёлкышто гына ынде эсогыл Кугу Сеҥымашын юбилейжылан пӧлеклалтше посна скверат «кӱын шушаш».
Сеҥымаш кече вашеш Семеновко селаште сар гыч пєртылдымӧ салтак-шамычлан стеллым почыныт. Сарын ветеранже-влак советын председательже Антонина Бурлакован тыршымыжлан кӧра ты паша вораҥын. Тудо шкежак ончыч салтак-влак нерген уверым поген. Данилансола, Семёновко калык, коммерческий организаций, предприниматель-влакын полшымышт дене ты шонымаш илышыш шыҥдаралтын. Шем гранит гыч кум плиташ 160 салтакын лӱмыжым вераҥдыме. Тушкак эше бронзо шӱдырым вераҥдаш палемдыме. Но тудым Кострома гыч эпидемий мучашлалтмеке гына кондат. Тиде стеллыже Семновкысо Чап аллейым ыштен шуктымо пашан пытартыш штрихше лийшаш.
У Торъял район Кузнеч ялыштат Кугу Сеҥымашын 75 ияш лӱмгечыже вашеш Чап монументым почыныт. Тудо Сеҥымашым лишемдаш полшышо-влаклан пӧлеклалтеш: плита ӱмбаке фронтовик, тылын труженникше да сарын икшывыже, сар гыч пӧртылдымӧ-влакын лӱмыштым вераҥдыме. А посна плитам Афган сарын геройжо Николай Якшовлан пӧлеклыме. Кузнеч кундем гыч сарыш чылаже 435 еҥ каен, 197-ше пєртылын огыл. 81 салтак сєй пасушто колен, 25 –сусырген, 126 – увер деч посна йомын. 16 ўдырамаш тыгак сарыште кредалын. А шийвундым ты пашалан республикын правительствыже, Чӱксола администраций да посна еҥ-влак ойыреныт.
Шернур районысо Шокшем ял калыкат 9 майлан кугу шучко сареш вуйым пыштыше коча-кова-влак лӱмеш мемориалым чоҥен шуктен да тудым торжественно почын. Чылдемыр ял шотан илемын депутатше-влак погынымашын председательже да ял старосто Иван Малининын, ял калыкын тыршымыштлан кєра шарныктыш кумылым нӧлта.
С.НОСОВА
Снимкылаште: Семёновко селасе стелле, Кузнеч ялысе Чап монумент, Шокшем ялысе мемориал
Фотом ВКонтакте социальный лаштыкла гыч налме
