Марий Эл вуйлатыше А.Евстифеев Йошкар-Олан мэрже Е.Маслов дене олам тӱзатыме йодышым каҥашен.
– Лум кайымеке, урем корным, тротуарым, шуко пачеран пӧрт пеленсе кудывечым да моло кумдыкым тӱзатыме шотышто олаште илыше-влак деч ӧпке шомак пураш тӱҥалыныт. Тидын шотышто могай паша ышталтеш манын, регион вуйлатыше мэрлан йодышым пуэн.
– «Лӱдыкшыдымӧ да чапле качестван автомобиль корно» нацпроектым илышыш шыҥдарыме дене чылажге 10,5 км кужутан 5 автокорным олмыктен шуктыман. Тидлан 300 млн. теҥге наре окса кучылталтшаш, – докладым ыштен Йошкар-Олан мэрже.
– Тачысе кечылан чыла аукцион эртаралтын, подрячик-шамыч пашам тӱҥалыныт. Нацпроект почеш Пролетарский, Комсомольский урем-влак капитально олмыкталтыт. Оласе бюджет кӱшеш лакылам петыркалыме пашат умбакыже шуйна. Тыгак 20 наре уремым, 3 кӱварым, 1 корнысавыртышым тӧрлаташ палемдыме. Чумыр кужытшо 18 километрыш шушаш да тиде пашалан 65 миллион теҥге наре кайышаш. Палемдыме пашан икмыняр ужашыжым ыштыме. Темпым иземдыде, умбакыже тыршена, – увертарен администрацийым вуйлатыше.
– Паша графикым палемдыме годым эн ончыч олаште илыше-шамычын шонымыштым шотыш налман, – палемден А.Евстифеев. «Кызытсе жаплан келшыше оласе средам ыштымаш» федеральный программыш ушнен, чумыр шотлымаште 11 кумдыкым уэмдаш палемдыме. Тидлан 90 миллион теҥге кая, – каласен столицын мэрже.
– Тротуарыште асфальтым уэмдат, ола уремласе меҥгылаште понарым вашталтылыт, изи архитектур формым вераҥдылыт. Шым тротуарым олмыкташ чумыр шотлымаште 75 миллион теҥге нараш контрактым пеҥгыдемдыме. Контракт акым иземден кертмылан кӧра оксам аныклен кодаш йӧн лектын. Чыла контракт июльлан пеҥгыдемдыме лийыт, – ойлен Е.Маслов.
А.Евстифеев канаш йӧрышӧ кумдыкым тӱзатымыланат тӱткышым ойыраш темлен.
– Пырля лиймым жаплан чарыме режим республикыштына эркын лушка. Садлан каныме кумдык ден парковатлыме вер ямде лийшаш улыт. Каныме кумдык ты жаплан шотыш кондымо лийшаш, – поснак ойырен палемден Марий Эл вуйлатыше.
Утларак да утларак предприятият пашам ышташ тӱҥалыт. Тидын годым пашажир-влакат шукемыт. Ындыжым общественный транспорт пашажым келшышын шукта мо?
Транспортым ситарыме йодышым ола администраций ден транспорт да корно озанлык министерствын кече еда контрольыштыжо кучат, – ӱшандарен ойлен олан мэрже.
Марий Эл вуйлатыше ола уремым тӱзатыме йодышым контрольышто кучаш, пашам палемдыме жапыште шукташ шӱден.
Марий Эл вуйлатышын организаций да аналитике виктемжын уверже-влак негызеш Р.ЧЕПАКОВА ямдылен
