Йошкар-Олаште илыше 48 ияш пӧръеҥын пел миллион наре теҥге оксажым ондален налыныт.
Тудлан палыдыме еҥ йыҥгыртен да ик банкын лӱдыкшыдымылык службо пашаеҥже улмыж нерген каласен. Вара увертарен, пуйто счетшо гыч оксажым налаш тӧчат. Пӧръеҥ ӱшанен да саде «пашаеҥын» чыла кӱштымыжым шуктен: 496 тӱжем теҥге оксажым йомдараш огыл манын, шийвундыжым тӱрыснек темлыме вес резервный манме счетыш колтен. Ондалалтмыжым тудо банкыш мийымекыже гына умылен…
Полиций пашаеҥ-влак эше ик гана ушештарат:
— телефоныш йыҥгыртыше да банк пашаеҥ улмыж нерген каласыше палыдыме еҥ-влак дене мутланыман огыл;
— палыдымын йодмыжым шуктыман огыл;
— шке счет нерген уверым пален налаш манын, банкыш кайыман але банк картыште палемдыме телефон номерыш йыҥгыртен рашемдыман;
— шарныман: банк пашаеҥ-влак нигунамат картын пин-кодшым але смс дене толшо кодым огыт йод, оксамат вес банк счетыш кусараш огыт кӱштӧ.
Л.КАМАЛЕТДИНОВА