Александр Евстифеев правительстве председательын алмаштышыже Вячеслав Пашиным паша гыч колтымым умылтарен.
Марий Эл Республикым вуйлатышын обязанностьшым жаплан шуктышо Александр Евстифеев правительстве председательын алмаштышыжын, промышленность, транспорт да корно озанлык министрын должностьышт гыч Вячеслав Пашиным утарыме нерген пунчалыш кидшым пыштен. Нине обязанностьым ынде ончычсо министрын алмаштышыже Дмитрий Волков жаплан шукта.
А.Евстифеев кадр решенийын амалжым журналист-влаклан тыге умылтарен: «Пашинын таче кече марте курироватлыме сферыште пеш неле, чоным почын ойлаш гын, катастрофический ситуаций лиймым чыланат сайын паледа. Тыгодымак тудо «Россия24» телеканаллан министрын должностьыштыжо лийын кертдыме кугу кӱкшытыш шумыж нерген кугу интервьюм пуэн. Тидат веле огыл. Тиде программым ончымем деч вара тыгай иктешлымашым ыштышым: министрже пуйто интервьюм налше журналист Екатерина Кудрявцева. Тудо шкенжым отрасльыште мо ышталтмым сайын палыше еҥ семын ончыктыш. Кучемыште улшо айдеме чынлан келшен толдымо фактым экран гыч ойлышаш огыл».
М.ИВАНОВА.
