Кӱчык жапыште социал сетьлаште весела марий шӱлышан видео кумдан шарлен. Тудым мыняр еҥ ончен? Каласенат мошташ ок лий. Мутлан, Вконтактесе «Марий муро» тӱшкаште гына 46 тӱжемат пеле еҥ ончен.
Видео тыгай: сценыште кум рвезе мурен кушта. Кок тӱрысӧ ньога-влак йошкар тӱсан марий тувырым чиеныт. Покшелнышт — эшеат изирак ийготан рвезе. Тудыжо ош марий тувыран. Мошта ма, уке, кугурак-влак почеш Михаил Веселовын мыскара мурыжым йоҥгалтара.
«Видеош Волжский район Сотнур селаште илыше Никас, Илья да Тихон Игнашевмыт логалыныт. Никаслан лу ий, Ильялан – кудыт. Нуно «Шайра» фольклор ансамбльыш ынде 3-4 ий коштыт. Шольыштлан кум ий веле. Тыге гынат тудо изаже-влак дене пырля мероприятийыш чулымын ушнен.
16 мартыште Руш Шайра тӱвыра пӧрт отчётный концертым эртарен. Тунам рвезе-влак ты номер дене сценыш лектыныт», — палдарыш ты тӱвыра пӧртын вуйлатышыже Нина Николаева.
О.МОШКИНА
