«Шочмо мландын кугу вийже» калык усталык фестиваль умбакыже шуйна. Кодшо рушарнян Медведево районысо коллектив-влак мастарлыкым ончыктеныт.
Медведево районысо военкомат гыч Кугу Отечественный сарыш 11 тӱжем салтак каен. Нунын кокла гыч 3905 еҥже пӧртылын огыл. Ты кундемын кум шочшыжо, В.Архипов, М.Логинов, А.Шумелёв, Совет Ушем Герой лӱм дене палемдалтын, а Л.Волков ден Н.Смирнов Чап орденын тичмаш кавалерже лийыныт. Кызыт районышто сарын 17 участникше, тылыште тыршыше 370 еҥ илат.
Кеҥежым калыкын («Весела сем», «Мур пеледыш», «Муро аршаш» ансамбль-влак) пайремыште чӱчкен-мурымыж годым элышкына фашист тӱшка керылт пурен. Тушман ваштареш кредалаш пӧръеҥ-влак дене пырля 17 ияш ӱдыр-шамычат («Маска» калык театр) каеныт. Нуно санитар, снайпер… лиймышт, тыныс илыш верч илаш-колаш кредалмышт нерген ойлышт. Сар! Могай кочо шомак! Мыняр ола ден ялым, куралын ӱдышаш пасум вӱран мландыш, ломыжыш савырен. Сӧй пасуэш мыняр салтакын ӱмыржӧ кӱрылтын, мыняр йоча индыралтын?! «Просто это война» (О.Сайгина) муро йоҥгымо годым экраныште сарыш вуйым пыштыше салтак-влакын лӱмыштым ужын кертна.
Кеч-мыняр йӧсӧ лийын гынат, салтак-влак муро («Пӱкшерме» ансамбль, К.Савельева) да сылне сем (В.Якимов) дене ойгыштым «шулыктареныт».
Сар жапыште ӱдырамаш-влаклан мом гына чыташышт логалын огыл? Нунын шинча ончылныштак икшывыштымат лӱен пуштын але орландарен кертыныт. Тидлан кӧра нуно пеҥгыде, виян лийын шуктеныт, но ава улмыштым монден огытыл. О.Прокопчукын «Матерь человеческая» роман гыч ужашым лудмыжо чонышкак логале, кӱч дене пуйто кӧргым удыренак лукто.
Тек эре тыныс илыш, вуй ӱмбалне канде кава лийыт. Сарыште илаш-колаш кредалше-влакым ме шарнена да нунылан ӱмырна мучко тауштышаш, Шочмо мландынам, элнам моктен мурышаш улына. Тыгаяк шонымаш дене медведево коллектив-влак шке концерт программыштым мучашлышт.
14 мартыште фестивальыште Советский ден Кужэҥер районласе коллектив-влак мастарлыкым ончыктат.
Алевтина БАЙКОВА
М.Скобелевын фотожо
