10 декабрьыште М.Шкетан лӱмеш Марий национальный драме театрыште инвалид-влакын республик кӱкшытан «Порылыкым пӧлекле!» усталык фестивальышт икымше гана лийын. Тудо Инвалид-влакын декадышт кышкарыште эртыше мероприятий-влакым иктешлен.
Театрын фойештыже тӱрлӧ мастер-класс ден кидпаша ончер эр годсек гӱжленыт. Волонтёр-медик ден Бауман лицейын тунемшыже-влак, калыкым социально обслуживатлыме комплексный рӱдерлан пашаеҥышт ден нунын ончымо еҥышт парафин дене сӱретлаш, у ий суксым ышташ, совлам кырен, семым лукташ, шарик дене пеледышым келыштараш туныктеныт.
Вара фестивальын конкурс программыже тӱҥалын. Уна-влакым Марий Элын социальный вияҥмаш министрже Ольга Федорова, Йошкар-Ола да Марий митрополит Иоанн саламленыт, тылеч посна тӱвыра, савыктыш да калык паша шотышто министр Константин Ивановын, молодёжный политике, спорт да туризм министр Лидия Батюкован саламлымашыштым лудыныт.
Фестивальын конкурс программыштыже выступатлыше артист-влак ончаш толшо-шамычым шортаренытат, воштылтаренытат… Адакше нунылан шукерте огыл курымаш юбилейым палемдыше театрын сценыштыже шке мастарлыкым ончыкташ кугу пиал лийын.
Чыла участниклан шарнымашан пӧлекым, а сеҥыше-шамычлан Чап грамот ден призым кучыктеныт.
Фестиваль республикысе калыклан келшен, сандене тудым ий еда эртараш тӱҥалаш ӱшан уло.
М.ИВАНОВА
