Калык фронтын Марий Элысе региональный пӧлкажын тыршымыжлан кӧра Йошкар-Ола йыр «ужар аралтыш» ышталтын.
Эртыше кечылаште Марий Элысе Кугыжаныш Погынын депутатше-влак рӱдола йыр чодыра паркан ужар ӱштым ыштыме нерген законым пеҥгыдемденыт. Мер пашаеҥ-влак тидын верч кок ий тыршеныт.
«Ужар аралтыш» кумдыкыш Медведево районышто верланыше 17 тӱжем гектар мландым пуртымо. Тудын чекше-влакым закон лекме деч вара 180 кече жапыште палемдышаш улыт, кадастр паша 1,4 миллион теҥгеш шушаш. Тиде оксажым республикын вес ийысе бюджетын проектышкыже пуртеныт.
«Ужар аралтыш» ыштыме дене кылдалтше паша 2017 ий гычак вораҥын. Ты шотышто икымше общественный колыштмаште темлымаш верч шуко еҥ йӱклен гынат, исполнительный кучемын органже-влак ончыч, Йошкар-Олан да Медведево районын вияҥме планыштым шотыш налын, тудын чекше-влакым палемдаш темленыт.
ОНФ-н Региональный общественный мониторинг рӱдержын картографий материал дене экологий да чодырам аралыме йодыш шотышто экспертше-влак ты участкын чекшым палемденыт да 2018 ий майыште угыч эртарыме колыштмаште тудын дене палдареныт. «Ужар аралтыш» нерген йодыш Марий Эл вуйлатышылан пуымо общественный темлымаш спискышкат икмыняр гана пурталтын. Тений ты темлымаш дене Марий Элын Пӱртус поянлык, экологий да йырым-йырысе средам аралыме шотышто министерствыжат келшен да ты йодышым депутат-влаклан ончаш луктын.
«Йошкар-Олаште неле промышленность дене кылдалтше предприятий-влак уке улыт гынат, ме тидын дене рӱдоланан «ужар» статусшым у тукымлан арален кодена», — палемден Марий Элыште ОНФ-ын экспертше Алексей Маторкин.
С.НОСОВА
