КУЛЬТУР ДА ИСКУССТВО

Сӱретше чонлан лишыл верым шарныкта

Екатеринбургысо Наивный искусство тоштерыште сӱретче-любитель-влакын «Сеҥымашын тулсавышыже» ончер почылтын.

Кугу Отечественный сар дене кылдалтше тематикылан сӱретлыше мастар-влак шке пашаштым ончыктат. Урал да Юл кундем федерал округла гыч чылаже 100 наре пашам ушымо. Вара нуным Кугу Сеҥымашын 75 ияш лӱмгечыжым палемдыме годым Москвасе Поклонный гораште эртышашлык всероссийский ончерыш колтат.

Организатор-влакын палемдымышт почеш, сӱретче-влак шке мастарлыкышт дене веле огыл ӧрыктареныт. Сар дене кылдалтше сюжет-шамычшат шонен лукмо огытыл. Южо мастарже сарым шке шинча денак ужын. Ик тыгай сӱретчыже Киров область гыч марий пӧръеҥ Владимир Унженин лийын. Тудо шочмо Тараканово ялыштыже илыше ик ӱдырамашын шарнымашыж почеш сӱретым возен: верысе калык сарыш ныл еҥым ужатен, а сеҥымаш деч вара иктыжым гына вашлийын.

Владимир Унженин – Марий Эл Республикысе тӱвыран сулло деятельже, мер пашаште чолгалыкым ончыкта. Ӱмыржо мучко туныктымо пашаште тыршен. Пижан районышто шочын-кушшо рвезе Марий кугыжаныш педагогике институтым тунем лектын. Марий Элысе школышто директорлан ыштен. А 1974 ийыште шочмо верышкыже илаш куснен да 30 ий наре шке школ директорлан тыршен. 1978 ийыште тудо Всесоюзный искусство университетын художественный фотографий пӧлкажым тунем лектын. Ончыч фотографироватлаш кумылан лийын гын, варажым сӱретлаш тӱҥалын. Ты паша ӱмырешлан шӱмешыже возын. Кызыт тудын мӧҥгысӧ тоштерыштыже 40 наре радына уло. Ятыр пашаже область мучкат, Йошкар-Олаштат ончыкталтыныт.  Мом але мо нерген тудо сӱретла? Йырым-йыр ужмо илышым авалта, тургыжландарыше йодыш-влакым тарвата…

А тургыжландра тудым таче марий йылмым арален кодымо йодыш. Поснак Киров областьысе марий-влак коклаште. Санденак тудо марий йылмым, тӱвырам вияҥдыме дене кылдалтше йодыш-влакым каҥашыме кугу мероприятийлаш лӱмын Марий Элыш толын коштеш. Шке школыштыжо  марий йылмымат туныкташ тӱҥалмылан лач тудлан тауштыман. Калыкнан ойыртемалтше сынжым, марий ялыште тӱвырам арален кодымо вер тудо тачат тырша. 54 ий туныктымо паша стажан айдеме 43 ийым школ директорлан ыштен. Сулен налме канышыш лекше еҥ кызыт эре  сӱретла. Тудын пашажым ончен, чонлан келшыше сюжет-влакым ужат…

Тений Владимир Васильевич Москвасе Наивный искусство тоштерыште  эртышашлык всероссийский ончерыш ушнаш шона. Сӱретче тушкошке пашаже-влакын фоторгафийыштымат колтен. Тиде ынде 63-шо ончерже лиеш.

С.НОСОВА

Снимкыште: В.Унженин, тудын пашаже.

 М.Скобелевын фотожо да В. Унженинын фотрепродукцийже.

Опубликовать в Одноклассники

Добавить комментарий