Тыге лӱмдалтын Морко район Шӱргыял школыштына эртаралтше таҥасымаш. Тушто 5-9-ше класслаште тунемше-влак, посна отрядлан шелалтын, тӱрлӧ таҥасымаште вийыштым тергат, усталыкым, чолгалыкым ончыктат.
Отряд-влакым «Рвезе тукым» йоча ушем чумыра. Тушто икшыве-шамыч усталыкыштым шуарат, уш-акылыштым пойдарат да йоча пагыт гычак кугезе йӱлам аралаш тунемыт. Мемнан дружиныште 25 пионер шотлалтеш.
Кажне тунемме идалык мучаште, 19 майыште, 4-ше классым пытарыше йоча-влакым пионер радамышке пуртена. Нуным дружине вуйлатыше ушемнан йӱлаж дене палдара, барабан йӱк почеш элнан тистыже нӧлталтеш, горн шке йоҥгалтеш. Тыге пионер радамышке ушнышо кажне ӱдыр-рвезе ончыкыжым чын пионер лияш, шочмо эллан да шке калыклан ӱшанле кушкаш, «Рвезе тукым» йоча ушемын уста еҥже лӱмым ӱлыкӧ волташ огыл манын товатмутым пуа.
«Мыйын отрядем – мыйын сеҥымашем!» таҥасымаш «Рвезе тукым» йоча ушемын гимнжым йонгалтарыме да дружине вуйлатыше Анатолий Александровын барабаным кырымыж дене мучашлалтын. Ты мероприятий икшыве-шамычлан чулымлыкым ешара. Тулшолла йӱлышо йошкар галстукна сынжым вашталтен гынат, кугезе йӱланам нигунам огына мондо, арален илаш тӱҥалына.
Е.ГРИГОРЬЕВА.
Авторын фотожо.
Снимкыште: 5-ше классын «Неугомон» отрядше таҥасымаште 3-шо вер дене палемдалтын.
![](https://xn--80aaajllkisg9bu3m.xn--p1ai/wp-content/uploads/2017/04/отрядем-1210x642.jpg)