Кондиционер – кеҥежым лӱп шокшо игече шогымо годым пӧлемысе южым йӱкшыктарыше веле огыл, тыгак юалге пагытыште ырыктыше, вӱдыжгыштӧ коштышо устройство. Тудо поснак шыжым-шошым кӱлешан. Мутлан, шыжым ТЭЦ-ын батарей ден радиаторым ырыкташ тӱҥалмыж деч ончыч паша кабинет ма пачер палынак йӱкшат. Тыгайыштыже ны пашам шот дене ышташ, ны ласкан малаш. Тиде ситыдымаш шошымат, шокшым йӧртымек, йӱштын угыч пӧртылмыж годым палдырна. Тыгай годым кондиционерын шокшым тулымо ойыртемже сай велым аклалтеш. Статьяште оборудованийым шокшо южым тулымо режимыш кусарыме, тидым кузе чын ышташ кӱлмӧ, тыгодым могай йодыш лектын кертме дене палдарена.
Кондиционерым телым «шокшо» режимыште кучаш лиеш мо? Тиде йодыш шуко еҥым тургыжландара. Да тидлан ӧрманат огыл, вет зданийыште, кабинетыште але пачерыште келшыше климатым кучаш полшышо устройство – шергакан оборудований, сандене тудын шолдыргымыжлан иктат огеш куане.
Кондиционер телымат пашам ыштен кертеш, но уремыште чот йӱштӧ игече шогымо годым тудын дене лучо пайдаланаш огыл. Тыгай оборудованийын шуко модельже уремыште кандаше деч шукырак градуслан йӱкшемдыме годым пашам ышташ келыштаралтын огытыл: устройствын чараште кечыше блокшо кылма гын, чумыр агрегат строй гыч лектеш. Но 30 градус марте йӱштыштӧ пайдаланаш лийме инверторный кондиционерат уло! Оборудований пеленысе кажне инструкцийыште уремысе температурын эн изи отметкыже ончыкталтеш – тылеч йӱштӧ годым кондиционерым чӱкташ огеш темлалт. Тыгай сынан документ уке гын, аппаратын пашаж дене кылдалтше чыла йодышым кондиционерым ыштен лукшо фирмын официальный представительже деч рашемдаш лиеш.
Кондиционерым «шокшо» режимыш кузе кусараш? Устройствын чыла гаяк модельжым «ырыктыме» режимыш ик семын кусараш лиеш. Тыге,
- Устройствым виктарыме пультышто «ON/ OFF» кнопкым темдалын чӱктыман.
- «Шокшо» режимыш «HEAT» кнопко полшымо дене кусныман.
- «HEAT» кнопко уке гын, режимым «MODE» кнопкым темдалын ойырен налман.
- Почылтшо менюшто «HEAT» режимым муман да тудым пашашке «кычкыман». Кнопкым тиде лӱм лекмеш темдыман. Тыгодым кӧргӧ блокысо таблошто чӱчкыдынжӧ «кече» значок чӱкталтеш.
- Тыгеат лийын кертеш: кондиционерым виктарыме пультышто «лум», «кече», «вентилятор» але «чӱчалтыш» сӱретым посна клавишыш лукмо. Тыгай годым «кече» индикаторан клавишым темдалман, да оборудований ырыктыме режимыш кусна.
- Ынде пультысо «+», «-» але «кӱшкӧ», «ӱлыкӧ» (знак дене ончыкталтеш, ойыртемже модель дене кылдалтын) кнопко-влак полшымо дене паша кабинетыште ма пачерыште кучаш шонымо температурын цифржым шындыман. Тыгодым тудо пӧлемысе деч изи огыл, а кугурак лийшаш.
- «Шокшо» режимыш кусарыме деч вара кондиционер южым 5-10 минут гыч веле ырыкташ тӱҥалеш. Тымарте пашашке вентилятор гына «кычкалтеш», да кабинетыште ма пачерыште юж мӧҥгеш-оньыш кошташ тӱҥалеш. Кондиционерын «шокшо» режимыш тынар кужун куснымыжо оборудованийын мӧҥгешла корно дене пашам ыштымыже, икманаш, фреоным паша контурышто реверсивный режим почеш коштыктымыж дене умылтаралтеш. А тидланже устройствышто давленийым тӧремдаш кӱлеш, уке гын компрессор пудырген кертеш.
- Тиде кондиционерым «шокшо» режимыш кусарыме тӱрыс радам. Южо модельыште мо кӱлешым ончыч пультышто келыштарат, вара гына, «ON/ OFF» кнопкым темдалын, устройствым чӱктат.
Тидымат палемден кодыман: «кече» режим дене сплит-системын чыла модельжак огыл пашам ыштен кертыт. Пультышто «HEAT» кнопко уло гынат, устройство южым огеш ырыкте. Тидыже компаний-влакын тӱрлӧ модель кондиционерым виктараш стандартлан шотлалтше ик пультым кучылтмышт дене умылтаралтеш. Сандене механизмым «шокшо» режимыш кусарыме деч ончыч инструкцийже дене палыме лияш але тиде функцийын улмыжым поставщик деч рашемдаш кӱлеш.
Кондиционер южым огеш ырыкте гын, мом ышташ? Кондиционерын пашажым «шокшо» режимыш кусарымек, агрегат 15 минут гыч паша кабинетысе але пачерысе южым ырыкташ тӱҥалшаш. Оборудованийын тиде режимыште пашам ыштымыжым умылаш неле огыл. Тидланже коллекторышкыжо кидым лишемдымат сита: шокшо юж толкын лектеш гын, шонымым шуктымо. Но тымарте тыршыме арамат лийын кертеш. Тидлан тӱрлӧ амал уло:
- кондиционерыште «ырыктыме режим» функций уке;
- палемдыме режимыште оборудованийын пашажым йоҥылыш виктарыме;
- агрегатыште ала-мо шолдырген.
Икымше случайыште аппаратыште «шокшо» режим уло-укем рашемдашлан кондиционер дене пайдаланыме шотышто инструкцийым гына тӱткынрак шергалман. Тыгай режим уло, но кондиционер паша кабинетысе але пачерысе южым садак ырыкташ тӱҥалын огыл гын, тудым статьяште темлыме икымше ошкыл гыч мучаш марте угыч келыштарыман. Тылеч вара, 10-15 минут эртымеке, сплит-системын «шокшо» режимыште ыштыме пашажым кидым радиатор деке лишемден тергыман.
Южгунам «HEAT» манын возымо але «кече» сӱрет кӱчык жаплан гына чӱкталтыт, да тыгодым агрегат «шокшо» режимыш ок вончо. Тиде ситыдымаш виктарыме пультысо питаний элемент дене кылдалтын. Куатше пытен гын, тудым у дене вашталташ кӱлеш. Системым угыч чӱктымеке, чылажат шке режимже дене пашам ыштышаш. Тыгай сынан «диагноз» виктарыме пультын сигналым колтышо пашаже пужлымо годымат палдырна. Тыгодым аккумулятор эше сай гын, тудым лукташ да тунамак мӧҥгешла шындаш гына кӱлеш. Палемдыме кок йӧн гыч иктыже системын паша режимжым ончыктышо индикаторын ситыдымашым кораҥда.
Кондиционер паспорт почеш «шокшо» режим дене пашам ыштен кертеш, тудым чӱктымӧ годым чыла пунктым шуктымо, но системе кӱлеш семын пашам огеш ыште гын, тугеже оборудованийыште ала-мо пудырген.
Сплит-системе, тудын паша кабинет але пачер кӧргысӧ, тыгак тӱжвалнысе блокшо-влак, – пеш сложный оборудований, сандене тудым лучо специалистлан обслуживатлаш ӱшанаш. Кондиционерлан «шокшо» режимыште пашам ышташ чаракым ыштыше амал сплит-системын кӧргӧ блокысо крыльчаткыжын лавыраҥмыже, юж фильтрын шӱкаҥмыже, хладагентын (фреон) йоген лекмыже але тудын кабинетым мойн сайын ырыкташ ситыдымыж дене кылдалтын.
Икымше случайыште, кунам эрыктыше сеткын ужашлашкыже, каналлашке, вентиляторын лопка мучашлашкыже шуко лавыра погына, да южым алмаштылше устройствын пашаже начаремеш. Тыгодым аппарат южым ырыкта, но таблошто палемдыме температур наре огыл, сандене паша кабинет ма пачер ситышын ырен огыт керт. Тиде ситыдымашым кораҥдаш неле огыл: сплит-системын пӧлемыште кечыше блокшын ончыл панельжым кораҥдыман да тыште верланыше крыльчаткым, сеткан фильтрым эрыктыман. Тидлан специалист огеш кӱл. Но тыгодым оборудований электросеть гыч йӧртымӧ лийшаш, адакше тыгыде деталь-влакым кидым сусыргымо деч шекланенрак йыгыман, шӱлымӧ корным пурак деч аралыше маскымат чияш уто огыл.
Кокымшо случайыште, фреон уке гын, кондиционер тудын вошт эртыше южым ны огеш ырыкте, ны огеш йӱкшыктаре. Хладагент кок амал дене йомын кертеш:
- системе шӱтлен;
- тудым системыш шукертак темыме огыл.
Южгунамже эсогыл профессиональный монтажник-влак кондиционерым кӱлмӧ семын чак огыт шынде, сандене фреонын изин йоген лекмыжым ужын шукташ неле. Икманаш, кондиционерын икмыняр жап пашам ыштымыж деч вара системыш фреоным ешарымым нормылан шотлаш лиеш. Тидым шке семын ышташ неле, сандене специальный оборудованиян да материалан специалистым ӱжыкташ шотлан толеш.
Кондиционерым «шокшо» режимыш кузе кусараш манме йодышлан тичмаш вашмутым пуышна, шонем. Шкат ужыда, оборудованийыште иктаж уто-сите уке гын, тидым ышташ нимо неле огыл, да икмыняр жап гыч паша кабинетыште ма пачерыште шокшо да ласка лиеш.
М.ИВАНОВА
