Тенийысе кеҥеж сай игечым шагалрак пӧлеклен гын, шыже пареҥге лектыш дене калыкнам куандарен. Чылан гаяк ойлат: пареҥге тений сайын шочын. А южыштын тудо тугай кугу, ик паренгыжак чумыр ешлан шолтен, кӱктен ма, шинчын кочкаш сита. Теве «Марий Эл» газетын ялозанлык теме дене возышо журналистна Вячеслав Смоленцеват пакчаштыже эсогыл килограмм нелытан паренгым пургед лукмо нерген ойлыш. Но эшеат кугурак пареҥгым кӱнчен лукшо-шамычат улыт. Оршанке районышто эсогыл ик килограмм да 600 грамманымат верештыныт.
Кызыт лач тиде рок саскам лукмо пагыт. Но пытартыш жапыште еҥ-влак паренгым шындыме паша деч йӱкшен толыт. Кужэҥер посёлкыштак тыгай тидлан млданде участкым кучышо-влак шукын отказат. Паренгым шындаш кучылтмо роскотшо кугу, налаш шулдынрак шуэш, ойлат.
Но кӧ тиде акрет культурым теният шынден гын, ӧкынен огыл, очыни. Теве шукерте огыл командировкышто лийме годым Кужэҥер районысо Шойдӱҥ ялым ончал савырнышна. Уремыште пӧръеҥ тӱшкам вашлийна. Нуно чыланат кажныже шке пакчаштыже паренгым кӱнченыт. Пырля каналташ лектыныт ыле. Пареҥгын тенийсе сай лектышыж нергенак ойлышт.
Кеч тыгай тургым пагытыште уремыште коштшыжым от уж, чылан пакчаште гаяк улыт. Кӧжо кид дене, кӧжо копалке, мотоблок полшымо дене кӱнчат. Теве Анатолий ден Лидия Малининмыт пакчаштак шогылтын ыле. Рок саксажым тошто семын шаньык дене кӱнченыт. Илалше ача-авалан шочшышт-влак лукташ полшеныт. Нунат тенийысе лектышым моктышт.
Кеч-кӧ кеч-мом ойла гынат, мланде марий калыкнам пукша да йӱкта. Сандене тидын шотыштак Марий Элысе Республикысе прокуратур гыч пурышо увер ӧрктарыде ыш керт. Козьмодемьянскыште ик пӧръеҥ шке пакчаштыже пареҥгым ончен куштымо олмеш, евангелий христиан баптист йолташыже-влак дене религиозный йӱла-влакым эртарен. Прокуратур пашаеҥ-влакын тергымашышт тидым пеҥгыдемден. Сандене прокуратурын пунчалже негызеш, Росреестрын верысе пӧлкаже озажлан 10 тӱжем теҥге административный штрафым тӱлаш пуэн, вет РФ закондательстве почеш мланде участкым да тушто шогышо оралтым тыгай сынан мероприятийым эртараш кучылташ ок лий. Чынжымак, оҥай кызыт илыш: тудым тӱзатен, ворандарен колташ манын иктышт лым лийде шке пакчаштышт тыршат гын, весышт, тышкак шуаш шонен, Юмылан кумалыт.
С.НОСОВА.
Снимкыште: Шойдӱҥ пӧръеҥ-влак паша коклаште каналтат; Малининмыт еш — пареҥге пакчаште; В.Смоленцевын лукмо пареҥгыже.
М.Скобелевын фотожо
