ШКОЛ ЙОЛГОРНО

«Эрла – школыш!»

Теве тыгай ӱжмаш дене 31 августышто Йошкар-Оласе Сеҥымаш паркыште пайрем мероприятий эртен. Тушто тунемме заведенийла гыч студент-влак тӱрлӧ предмет дене кылдалтше 14 площадкым ыштеныт. Мутлан, толшо уна-влаклан «Физкультур», «Математике», «Психологий», «Шочмо йылме», «Физике», «Медицине», «Астрологий», «Историй», «Технологий», «Экономике» предмет-влак нерген кӱчык жапыште кумданрак пален налаш йӧн пуалтын.   

Йоча-влаклан моткоч оҥай пайрем программым ямдыленыт. Кумылан-шамыч тӱрлӧ темылан келшыше мастер-классыште вийыштым тергеныт.  Изирак ӱдыр-рвезе-влаклан поснак сӱретлаш да уш-акыл пудыратылме занятий келшен. Нуно тыгак тӱрлӧ тӱсан кубикым  поген модыныт, а южышт «Подготовительный классыште» куанен шинченыт. А «урок» деч вара «школ буфетыш» ошкылыныт, «визытан»  отметкым налме дневникыштым да погымо жетоныштым вашталтен, пӧлекым налыныт.

– Таче наукылан, тӱвыралан, творчествылан, шинчымашлан пӧлеклалтше моткоч сай пайрем эртаралтын. Чыладам у тунемме ий дене саламлем. Шинчымаш кече – кажне ешын ойыртемалтше пайремже. Тудо икымше классыш тунемаш кайыше-влаклан ӱмырешлан шарналтше пагыт гын, студент-шамычлан профессийым налаш – у ошкыл. Чылаланда пиалым, илышыште сай кӱкшытыш шуаш тыланем, – палдарен Марий Эл Кугыжаныш Погын депутат, Республикысе профсоюз организаций-влак ушемын председательже О.Цветкова.

Е.ЭШКИНИНА.

М.Скобелевын фотожо.

Опубликовать в Одноклассники

Добавить комментарий