24-27 июльышто Чебоксарысе «Олимпийский» стадионышто куштылго атлетике дене (100 ий) Российын чемпионатше эртен. Тиде чемпионатыште элнан тӱрлӧ кундемже гыч 700 утла спортсмен вийжым терген. Участник-шамыч чылаже 400 комплект медаль верч таҥсеныт. Нунын коклаште Марий Эл гычат ӱдыр-рвезе-влак лийыныт.
– Мый 18 ияш кум рвезым намиенам. Нунылан тыгай кӱкшытан таҥасымаш опытым погымо семын лийын. Параньга район гыч Никита Чирков 800 метрыште вийжым терген. Тудо ты кужытышто спорт мастерыш кандидат нормативым ик гана веле огыл шуктен. Тӱҥалтышлан, манаш келшен толеш, У Торъял гыч Кирилл Сидоркин, Шернур район гыч Артур Матвеев сай результатым ончыктеныт, – ойла куштылго атлетике дене тренер К.Лукьянов. – Тыгай кӱкшытан таҥасымашке лекташ изиш лӱдыкшӧ, но рвезе-влаклан тиде, чынжымак, сай урок лийын. Адакшым чыланат ӱшаным пуышо, тыршыше улыт. Олимпийский резерв училище, ПГТУ гычат куштылго атлет-влак таҥасеныт. Чемпионат сай кӱкшытыштӧ эртен. Вес ийын элнан сборный командыже тӱнямбал кӱкшытыштӧ таҥасен кертеш.
Икманаш, куштылго атлетике дене Марий Элысе федерацийын пашаже куандарыше. Республикыштына Россий кӱкшытан кум судья уло: В.Воронцов, А.Шалгин, С.Гребнев. Нуно тӱрлӧ таҥасымаште, первенствыште, чемпионатыште судья сомылым шуктат.
Палаш: Марий Эл гыч спорт мастер Кирилл Семёнов (Звенигово район, тренерже К.Лукьянов) кызыт Екатеринбургышто спорт ротышто срочный службым эрта. Тудо триатлонышто, кроссышто вийжым терга. Сеҥыше ден призёр коклаш логалеш.
Е.ЭШКИНИНА
