Ола шотан Марий Турек илем кундемым тӱзатыме паша умбакыже шуйна.
Кызыт илем администраций «Олаште илыме йӧным саемдымаш» федерал программым илышыш шыҥдарыме дене кылдалтше документ-влакым ямдыла. Пӱтынь республиклан тиде программе почеш 137 миллион теҥге ойыралтеш гын, тышечын кум миллионжо Марий Турек посёлкылан толшаш. Тыгай полыш окса дене тений райрӱдыштӧ Луговой уремысе илыме пӧрт-влак кундемым, тыгак рӱдӧ паркым тӱзаташ, сӧрастраш тӱҥалыт. Тылеч посна райрӱдысӧ икмыняр уремыште корным ачалаш палемдыме. Теният ончычсо ийласе семынак кундемым тӱзатыме шотышто конкурс увертаралтеш. Мутлан, эн сайын кучымо, сӧрастарыме пӧртым, организацийын айлыме эн сай кумдыкшым, эн сай клумбым палемдаш тӱҥалыт.
Теният шагал огыл чоҥат
У Торъял районысо Какшанмучаш селаште кодшо ийын шӱкшӧ да аварий лӱдыкшан пӧртла гыч еҥ-влакым сай илыме верлашке кусарыме федерал программе дене келшышын, 12 пачеран пӧртым нӧлташ тӱҥалме. Тудын чумыр смете акше – 14 миллион теҥге.
Тылеч посна пӧртым сайын ачалыме программым умбакыже илышыш шыҥдарен толмо да райрӱдыштӧ шуко пачеран ныл пӧртым олмыктымо. Тидлан куд миллион теҥгем кучылтмо. Тулыкеш кодшо ныл икшывылан бюджет окса дене пачерым налын пуымо, самырык кум ешлан илыме условийым саемдаш кум сертификатым кучыктымо. Ялыште илыше да пашам ыштыше кум еш пӧртым чоҥен шукташ кугыжаныш полышым налын. Ӱмаште районышто чылаже 3,6 тӱжем квадрат метр кумдык илыме верым чонен шуктымо.
Сатужым кӱкшын акленыт
«Акашевский» сурткайык фабрике» ООО Москваште «Крокус Экспо» тӱнямбал выставке рӱдерыште чыве шыл гыч ямдылыме чапле качестван ятыр тӱрлӧ сатужым ончыктен.
Тений выставкым кок павильонышто эртарыме. Чумыр кумдыкшо – 21 тӱжем квадрат метр. Чылаже 350 участник 4 тӱжем утла ойыртемалтше сатум ончыктен. Мемнан республик гыч тыгай выставкыште ынде кокымшо ий почела кӱшнӧ ойлымо сурткайык фабрике участвоватла. Предприятий шке сатужым МУТРО Кэш энд Керри сетьыш колташ тӱҥалын. Фабрикын стендше дене палыме лияш ресторан бизнесын еҥже, тыгак Россий кӱкшытан кулинар чемпионатын финалыш лекше шеф-повар-влак командыже толыныт. Чылаже 100 утла клиент предприятийын партнёржо лияш кумылаҥын.
В.Смоленцев.
