УВЕР ЙОГЫН

Кугезе кочан тувыржо полша

Тений Пермь кундемысе Суксун районышто Мер Каҥашын темлымыж почеш региональный Марий самырык тукым слётым эртараш палемдыме. Тунамак тушто Мер Каҥашын верыш лектын эртарыме заседанийже лийшаш.

Тидыже тений апрельыште Йошкар-Олаште Мер Каҥашын эртыше шошымсо сессийже годым рашемын. Слётлан Мер Каҥашын Пермь крайысе пӧлкаже вуйын шогаш тӱҥалеш. Тудым  Раиса Попова вуйлата. А самырык-влак дене  пашам Кукуштан посёлко гыч марий рвезе Александр Николин виктараш тӱҥалеш. Тудо шкежат шошымсо сессийыш толын ыле.

 Александр марий ешыште шочын, руш посёлкышто илен. Туштыжо лач ик марий еш лийын. Санденак ик пагыт тудо марла начаррак мутланен, ешыштак гына. Но вара,  ушым шындымеке, шочмо йылмым тунемаш тӱҥалын. Тидлан ачаж ден аважак кумылаҥденыт. Олег Токтаров, Василий Домрачев гай лӱмлӧ марий-влак нерген пален налмеке, марий улмыж деч вожылмымат чарнен да шочмо калыкше нерген утларак пален налаш тыршаш тӱҥалын. Эркын марий мер илышыш шупшылалтын. Каласен кодыман, 2010 ийысе перепись почеш, Пермь кундемыште 4121 марий ила.

Но ты шотышто Александр чаманен ойла, шочмо йылме дене перьм марий-влак шагалынже мутланат. Санденак марий толкынын еҥже-влак,  поснак самырык-влак коклаште, кӧ улмыштым шижтараш шонымаш дене тыгай слетым организоватлаш шонат. Марий Эл, моло кундем гычат ӱдыр-рвезе-влакым ӱжаш лийыныт. Мут толмашеш, Александр шкежат марий самырык тукым слётышто ик гана веле огыл участвоватлен.  

Тудо Пермьысе политехнический университетыште нефтьым да газым перерабатыватлыше факультетыште шинчымашым пога. Инженерлан тунемеш гынат,  мер илышыште чолгалыкше тудлан ок мешае, мӧҥгешла, илышым у семын ончалаш, вес могырым аклаш тарата, палемда шкеже. Марий Элыште икмыняр гана лийын. Сандене шке кундемысе ден тысе самырык-влакым таҥастарен кертеш. «Тендан дене марий ӱдыр-рвезе-шамыч ик верыште огыт шинче, эре ала-мом уым кычалыт, «шолыт», – ойла тудо. 

Александрым вес йодышат тургыжландара: кузе марий йылмым модныйым ышташ? Кузе тусо самырык-влакым шочмо йылмылан шӱмаҥдаш? Тидын шотыштак тудо марий стикерым ышташ темла.

Шошымсо сессийыш толмыж годым Александр Пермь кундемысе марий-влакын тувырыштым чиен ыле. Пеш ковран койо. «Тувыржо кугезе кочамын Сава ачажын. Кочам ачажын тошто суртшо гыч конден улмаш. Туштыжо ӱдырамаш тувыр-влак веле лийыныт манын шонымо. Ончаш тӱҥалме гын, пӧръеҥ тувырат улмаш. Ынде тудым мый чием, – каласыш Александр. 

С.Носова

Снимкыште: А.Николин.

Авторын фотожо.

Опубликовать в Одноклассники

Добавить комментарий