18 майыште Тоштер-влакын тӱнямбал кечышт палемдалтеш. Тиде пайремлан Йошкар-Олаште, купеч Наумовын пӧртыштыжо, «Ший пӱян Пампалче» марий йомак да калык творчестве тоштер почылтеш.
Тудо шочмо калыкнан тӱвыражлан, преданийжылан, йомакшылан полеклалтеш. Тоштерым почаш Россий президент грант конкурсышто сеҥымаш полшен.
Пайрем программе 18 шагат кастене тӱҥалеш да 22 шагатыште мучашлалтеш. Тушто костюмироватлыме экскурсий, йомак герой-влак дене палдарымаш, калык модыш, интерактивный викторине, мастер класс-влак лийыт. «Йошкар олан геройжо-влак» икмыше марий комиксын презентацийышкыжат логалаш лиеш.
С.Носова
