«Транснефть-Кӱшыл Волга» АО 2019 ийлан адресный поро кумыл программым илышыш шыҥдараш тӱҥалын, тидлан тений 133,3 миллион теҥгем кучылташ палемден. Тыгак компаний 2017-2019 ийлан школ образованийым вияҥдыме корпоративный программышкат ушнен.
Поро кумыл паша ты гана тӱҥ шотышто Угарман областьыште ышталтеш гын, кокымшо программыже Марий Элымат авалта: тений, тудын дене келшышын, Шернур посёлкысо 2-шо №-ан да Килемар кыдалаш школ-влакын класслаштым олмыктат. Кабинетлаште омсам, электровоштырым, туврашым, пырдыжым да кӱварым уэмдаш, тыгак лабораторный пӧлемлаш у оборудованийым налаш палемдыме. Тылеч посна школ-шамычлан мебельым, интерактивный доскам, компьютер техникым, учебный пособийым, мультимедийный оборудованийым налаш йӧн лиеш.
Чыла кум тунемме верлан (кумшыжо – Угарман областьысе Воротынский школ) компаний чумыр налмаште 15,7 миллион теҥгем ойыраш палемден.
Г.Кожевникова
