25-26 апрельыште Йошкар-Олаште республикысе призывник-влак коклаште кеҥеж спартакиадыште тений гыч 11 команде вийжым терген. Участник-влак молгунамсе семынак иймаште, гранатым кышкымаште, тура лӱйылтмаште, кӱчык да кужу кужытыш писын куржталмаште таҥасеныт.
Теле да тыгак кеҥеж спартакиадыште икымше верым Волжский районын, кокымшым Советский районын, кумшо верым Морко районын командышт налыныт.
– Волжский районысо Кугу Корамас школышто тунемше (10-шо класс) Василий Васильев абсолютник-шамыч коклаште кокымшо верыш лектын. Рвезе 16-17 ияш рвезе-влак коклаште пятиборьеште 291 очком поген. Ты гана чыланат икшырымын выступатленыт. Кудытын лу эн тале коклашке логалыныт. Тидыже сай кӱкшыт. Тиде тургымышто командыш районнан икмыняр школ гыч рвезе-влакым чумырымо, – мане ты кундемыште спорт да физкультурылан вуйын шогышо А.Михайлов. – Чыла участник коклаште кымше верым Йошкар-Ола гыч Дмитрий Борухин налын. Тудо чылаже 357 очком поген.
Ик йодыш садак кодеш: ял ден селала гыч толшо-влакын результатышт иймаште начаррак. Вет тиде видлан ямдылалташ чыла вережак йӧн уке.
Ончыкылык салтак-влаклан сеҥаш тунемман. Такшым участник-влак сайын выступатленыт. Но южо тренерын темлымыж дене келшаш уто огыл: командыш кок ӱдырым ушаш кӱлеш. Вет пытартыш ийлаште военный вузлашке ӱдыр-влак пурат. Теле спартакиадышкат нуным ушаш оҥай. Икте кумылым волта: районлаште кыдалаш школжат, тунемшыжат шагалемеш, сандене командыш рвезе-влакым ик школ гыч веле ойыраш ок лий.
Тыгак тачысе саманыште тӱрлӧ техникын вияҥмыжлан кєра, поснак компьютерлан, шукыштын шинча пўсылык начарештеш.
Кок кече жапыште палемдыме чыла видыште призывник-шамыч шкештым мучаш марте тергышт.
Вет салтак илышым тамлаш ямдылалтше рвезе чылажымат чыташ тунемшаш, лӱддымӧ лийшаш. Мӱндыррак кундем гыч толшышт салтак семынак сборный пунктышто маленыт.
Е.Эшкинина.
