МЕР ИЛЫШ

Кугу лӱмгече, латикымше погын да «Пеледыш пайрем»…

25-26 апрельыште Республикысе мер-политике рӱдерыште Мер Каҥашын шошымсо сесийже эртен.

 Молгунамсе семынак тудо кок ужаш гыч шоген. Ончыч Мер Каҥашын пленумжо, вара «Тачысе марий койыш да ончыкылык» конференций эртеныт. Конференцийыште тарватыме йодыш-влак нерген вес номерыште каласалена, а теве пленумышто калыкнан илышыжым ваштален кертше пунчал-влакым ушештаренак кодыман.

 Ик эн ончыч Марий Эл Республикын 2020 ийыште 100 ияш лӱмгечыжлан пӧлеклалтше мероприятий-влакым эртарыме нерген мутланеныт. Тидын шотышто Марий Эл правительстве председательын икымше алмаштышыже Михаил Васютин  ойлен. Тӱҥ шотышто тудо юбилей дене кылдалтше мероприятий-влакым эртараш кугыжаныш кӱкшыт гыч ойыралтше шийвундым кучылтмо йодышым тарватен. А оксаже культурно-просветительский мероприятий-шамычлан да оралте-влакым уэмдыме пашалан ойыралтеш. Тудым кугу пайрем деч кум ий пагытыште кучылтман. Сандене Михаил Зиновьевич тышке мер еҥ-влакымат чолган ушнаш йодын. Мом ышташ кӱлмӧ да лийме шотышто сай темлымашым 2020 ийысе планыш пурташ эше вараш кодмо огыл.

Каҥашыме кокымшо йодыш вес ийын вӱдшор тылзыште  Марий калыкын ХI погынжым эртараш палемдыме дене кылдалтын ыле. Тудо апрель тӱҥалтыште лийшаш. Тыгак  тушто каҥашышашлык тӱҥ вич йодышым, делегат-влакым сайлыме радамым палемденыт. 1500 еҥ деч ик делегатым ойыраш тӱҥалыт.

Кумшо йодышышто марий калыкын «Пеледыш пайремжылан» кугыжаныш статусым пуаш йодмаш дене Марий Эл Правительствыш лекташ да тудым кажне ийын июнь тылзын кумшо шуматкечынже эртараш пунчалыныт.

 Пытартышлан Мер Каҥашын исполкомжын еҥже-влакым вашталтеныт.  Тӱрлӧ амал дене тушеч В.Иванов ден В.Байбулатовын лекмыштлан кӧра олмешышт Морко районысо администрацийын ончычсо вуйлатышыже Александр Иванов ден эрвел марий-влакын «Ош Виче» землячествыжым вуйлатыше Валентин Васюковым пуртеныт. Исполкомым Эдуард Иманаевлан вуйлаташ ӱшаненыт.

С.Носова

М. Скобелевын фотожо.

Опубликовать в Одноклассники

Добавить комментарий