«Тӱвыра» нацпроектын шукталтмыжым пален налаш манын, Моско уна-влак республикын тӱвыра, печать да калык-влакын пашашт шотышто министр Константин Иванов, тудын алмаштышыже Александр Луничкин да Кугыжаныш Погын председательын алмаштышыже Анатолий Иванов дене пырля оласе ятыр культур учрежденийым ончен савырныме.
— Тыгай группо дене Йошкар-Олаште икымше гана улына. Элнан президентшын шындыме задачыже чылажат шот дене шукталтшаш да калыклан пайдам кондышаш. Тидланже федеральный да регионысо бюджетла гыч шийвундо ойыралтеш,Сандене ме верлашке лектын коштына да национальный проектым илышыш шыҥдарымым тергена, вашлиялтше нелылык, лекше йодышым рашемдышаш улына, — палемден Федераций советын комитетшын членже, «Единая Россия» партийын Генеральный советын президиумжын национальный проектлам шуктен толмым тергыше группын членже Валерий Семёнов.
Эн ончычак Изи Какшан воктене чоҥалтше Я.Эшпай лӱмеш Марий кугыжаныш филармонийыште, Марий самырык театрыште лийынна. Тиде гана театрыш эҥер велым почмо омса гоч пурышна. Йыр ончен лекмеке, культур министр К.Иванов театрын ончыкыжым могай лийшашыже да могай пашам шуктымыж нерген кӱчыкын палемдыш. Ты театрыште уэмден олмыктымо паша 2024 ийыште мучашлалтшаш.
Тиддеч вара Изи Какшанын серже мучко йолын Благовещений башне деке эртышна. Элнан рӱдолаж гыч толшо уна-влаклан олан архитектуржо пеш келшен, йырваш куанен онченыт веле огыл, войзен кодаш тыршеныт. Башньыш миен шумеке, лӱмынак йодмо почеш пуйто шагатын курантше пералтыш. 11 шагат. Кугу уна-влаклан Т.Евсеев лӱмеш национальный тоштер вуйлатыше Светлана Зверева ончыкыжым башньыште эше икмыняр площадкым почаш шонымышт дене палдарыш. Йоҥгыдо, волгыдо зал мучко тӱрлӧ экспонатым ончен, эртыме годым кенета тӱмырым пералтыме, шӱвырым оҥарыме йӱк шергылте. М.Шкетан лӱмеш Марий национальный драме театрын артистше-влак Сергей Данилов ден Эдуард Яковлев семӱзгар-влакым шоктымышт дене калыкым шке йырышт чумырышт. Эскерыше группын еҥже Александр Струтинскийлан шӱвыр пеш келшен. Тудым савыркаленат ончыш, кузе ышталтмым йодын, оҥарашат тӧчыш. Шӱвыр йӱк йоҥгалтмеке, кугу уна чылт йочала йывыртыш. А кунам башньын смотровой манме площадкышкыже кӱзышна, кумыл эшеат нӧлталте. Тушечын Йошкар-Олана эшеат моторын коеш улмаш.
Моско уна-влаклан Православий тоштерыште, «Мэтр» телерадиокомпанийыште, Республикысе курчак театрыште, Национальный президент интернат-школышто, Историй да археологий тоштерыште, Э. Сапаев лӱмеш опер да балет академический театрыште лийме, поснак 12 апостолым ончымо да нунын дене кид кучен манме гай «саламлалтме» шуко жаплан шарнашышт кодеш.
— Ятыр вере лияш логалын, но тыште чылажат мотор да сылне, чылажат ик тураште – Изи Какшан сер дене – верланен. Шижалтеш, тыште тӱвыралан да сымыктышлан кугу тӱткыш ойыралтеш. Марий самырык театрлан Российысе моло регион-влаклан кӧранаш веле кодеш. Тыгак Национальный президент интернат-школышто районласе ӱдыр-рвезе-влак шинчымашым налыт. Илен-толын, нунат шке кундемыштым чапландараш тӱҥалыт. Йошкар-Олаште шке пашам тыршен ыштат, сандене полшымат шуэш, — мане Валерий Семёнов. — Тыште «Тӱвыра» нацпроект дене пашам тыршен шуктат, туге-гынат каҥашышаш йодыш эше шуко, вет республикын рӱдолаштыже веле огыл, районлаштат тидым шотыш налман. Тушто илыше-влак оласе деч ойыртемалтшаш огытыл, ситыше да сай услугым налшаш улыт.
Алевтина Байкова
