Марий Элым вуйлатыше Александр Евстифеев Ижевскыште РФ Лӱдыкшыдымылык советын секретарьже Николай Патрушев ден РФ президентын Юл кундем федеральный округысо полпредше Игорь Комаровын верыш лектын пырля эртарыме совещанийыштышт лийын.
Лийше мутланымашым иктешлышыжла, Марий Элым вуйлатыше каҥашыме теме-влакын пеш кӱлешан улмыштым палемден.
Тиде – корнышто лӱдыкшӧ деч посна коштмаш, еҥ-влакын тазалыкыштым арален кодымаш да корнылаште аварий лийын кертме лӱдыкшым иземдымаш. Вашлиймаште йоча-влакын тазалыкыштым аралыме темым посна каҥашыме. Ончымо йодыш-влак тӱрлӧ улыт. Нуно вашкеполыш машина-влакын пашашт, школ ден дошкольный учреждений-влак воктене корно гоч вончымо верлам келыштарыме, корнын статусшо шот дене кудалыштме писылык режимым шотыш налме дене кылдалтыныт.
Федеральный корно-влак сай качестван улыт. Тыгай корно кокла гыч 87 процентше норматив дене келшен толеш. Тидыжым тыштат палемдыме. Шуко азапше лач региональный ден муниципальный корно-влакын ушнымаштышт лиеда. Тыште водитель-влакын дисциплинышт, йоча-шамычым шупшыктышо автобус-влак ончылно шындалтше требований, автобус, вашкеполыш машина паркым уэмдыме нергенат ойлыде огеш лий. Икманаш, каҥашыме чыла йодыш пеш кӱлешан. Ме нуным решатлаш тӱҥалына»,- каласен журналист-влаклан интервьюм пуымыж годым Марий Элым вуйлатыше.
РФ Лӱдыкшыдымылык советын секретарьже Николай Патрушевын верыш лектын эртарыме совещанийыштыже Юл кундем федеральный округыш пурышо субъектлаште национальный лӱдыкшыдымылык дене кылдалтше йодышлам каҥашымаш тӱҥ темыш савырнен.
Ойлымыж годым тудо тыге палемден: кажне кечын ДТП-ште 50 наре еҥ кола, 600 наре еҥ сусырга. Тидыже мемнам тургыжландара да аварий лийын кертме лӱдыкшым иземдыме шумлык ешартыш мерым ышташ кӱшта.
Округысо корнылаште лийше азап кокла гыч шукыжо автомобиль корнын начар улмыж дене кылдалтын. Сандене РФ Лӱдыкшыдымылык советын секретарьже Николай Патрушев корнышто лӱдыкшӧ деч посна кошташ йӧным ыштыме шотышто региональный программе-влакым шуктымым да тидлан кӱлшӧ оксам ситарымым шинча ончылно кучаш субъект-влакын вуйлатышыштлан кӱштен.
Николай Патрушевын шонымыж почеш, пассажир-влакым шупшыктымо пашам утларак пеҥгыде контрольыш налман, йоча-влакым шупшыктымылан поснак кугу тӱткыш ойыралтшаш.
РФ президентын Юл кундем федеральный округысо полпредше Игорь Комаров округысо корнылаште мыняр азап лиеш гын, тышеч 39 процентше лач корнын начар улмыж дене кылдалтын манын палемден.
Совещанийыш погынышо-влак тыгак оборонно-промышленный комплексын предприятийлаштыже гражданский кӱлешлыкан кӱкшӧ технологиян производствышто диверсификаций пашам шуктымо йодышым каҥашеныт. Тидын годым тыге палемдыме: Юл кундем федеральный округышто 227 оборонный предприятий ден организаций пашам ыштат.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
