Теҥгече Марий Эл Республикым вуйлатыше Александр Евстифеев Кугыжаныш советын РФ субъект-влакын Президентын элым 2024 ий марте вияҥдыме национальный цельже да задачыже-влак нерген указшым шуктымышт шотышто йодыш дене паша группыжын заседанийыштыже лийын.
Заседаний Крым Республикысе Ялта олаште эртен. Тушто «РФ субъектласе исполнительный кучем орган-влакын Россий Федераций Президентын 2018 ий 7 майыште 204-ше №-ан «Россий Федерацийым 2024 ий марте вияҥдыме национальный цельже да стратегический задачыже-влак нерген» указшым илышыш пуртымо тӱҥ направлений-влак нерген» йодыш дене целевой показательыш шумо шотышто мера-влакым онченыт.
Мероприятийыште Кугыжаныш советын еҥже, Президент администрацийын представительже, палемдыме национальный проект-влакым курироватлыше федеральный министр ден нуным алмаштыше-шамыч лийыныт.
Марий Элыште тиде направлений дене кылдалтше паша сай лектышан. Шындыме йодыш-влакым шукташлан Марий Эл Республикым вуйлатыше пелен Стратегический вияҥмаш, проект паша да национальный проект ден программе-влакым регионышто шуктымо шотышто советым ыштыме.
12 национальный проектын паспортшо дене келшышын, республикысе министерстве ден ведомство-влак 53 федеральный проектыште участвоватлаш палемденыт. Нине задачым шуктышашлан Марий Элыш лишыл вич ий жапыште 61 млрд. утла теҥге пурышаш. 2019 ийыште нацпроект-влакым финансироватлыме кугыт 7720,4 млн. теҥгеш шушаш.
Утларак кӱлешан национальный цель ден стратегический задаче-влак семын республикыштына корно качестве да лӱдыкшыдымылык, здравоохраненийым модернизоватлыме, тыгак экологийым саемдыме йодыш-влак кодыт. Тыгеракын, 2019-2024 ийлаште Марий Элыште национальный проект-влакым илышыш пуртымылан финансированийын кугытшо тыгай лиеш: «Лӱдыкшыдымӧ да сай автомашина корно» – 16291,4 млн. теҥге, «Здравоохранений» – 13650,5 млн. теҥге, «Экологий» – 10450,4 млн. теҥге.
Национальный проект-влакым илышыш пуртымо дене республикын социально-экономический показательжым, тыгак регионысо калыкын илышыжым палынак саемдаш йӧн лиеш.
Марий Эл Республикын организаций да аналитике виктемжын уверже негызеш М.ИВАНОВА ямдылен.
