Оршанке районысо Калыкым социально обслуживатлыме рӱдерыште «Чон вашлиймаш» у клуб пашам ышташ тӱҥалын.
Тушко ветеран, тазалыкыште экшык улман да неле илыш ситуацийыш логалше йоча, Оршанке районысо «Российын доброволец ушемже» пӧлка гыч ӱдыр-влак ушненыт. Клуб тӱрлӧ ийготышто да социальный положенийыште улшо-шамычым интеллектуальный усталыкым пырля вияҥдыме, пайдале урокым эртарыме шонымаш дене ушен.
Икымше урок дизайнер пашалан пӧлеклалтын. И.К.Глушков лӱмеш шуко профилян Оршанке колледжын преподавательже Татьяна Сморкалован моштен вуйлатымыж почеш клубын еҥже-влак дизайнерын пашажым шуктеныт.
– Усталык кабинетем йочасад воспитатель, ойыртемалтше, тӱрлым шонен лукшо, ышташ кумылаҥше да просто оҥай еҥ-шамычым ямдыла, – каласкала Татьяна Александровна. – Кажнын чонышто кайык ила, кудым помыжалтараш кӱлеш! Дизайнер паша – усталык паша, тушто моторлык ила. Тиде пашан шуко тӱрлӧ видше ден техникыже улыт. Чыла, мо шке кид дене ышталтеш, лишыл да шергакан, илыме верыш сай, поро, шокшо шӱлышым шыҥдарыше.
Шыже кумыл тӱрлӧ лийын кертеш: весела, шӱлыкан. Идалыкын тиде пагытыштыже пӱртӱс омо кугыжанышыш пура, но тудын моторлыкшым кидпаша полшымо дене арален кодаш лиеш. Урокышто клубын участникше-влак шыже пушеҥгым келыштареныт. Кажне тӱшка, чиян кагазым тыгыдемден, кушкыл лышташым ыштен, а укш ден парчам пор дене сӱретлен.
Дизайнерын пашажым шуктымо годым кабинетыште шӱм-чоным вӱчкышӧ ласка сем йоҥген, сандене тудын ӧндалтышышкыже логалше-влак чыланат ик жаплан волшебникыш да сӱретчыш савырненыт. «Шӧртньӧ шыже» картиным возымо годым тӱҥалше дизайнер-влакын чурийыштышт, чоныштышт куан, ӧрмаш, порылык, шонкалымаш озаланеныт, сандене кабинетыштат шокшо да ласка лийын.
Клубын еҥже-влак ямде пашаштым тыге умылтареныт: «поҥгым нумалын кудалше шоҥшо, велше лышташ да тыгыде кожер», «нарынчалгыше садер, кава, шыже пагыт толын», «кушкыл чараҥеш, кок пушеҥге да шыргыжше кок кече», «шӧртньӧ вургемым чийыше пеш мотор пушеҥге», «саскалан поян олмапу»… Тӱҥалше дизайнер-влак кажнын пашажым совым рӱж кырен акленыт.
Чеверласыме деч ончыч «Чон вашлиймаш» клубын участникше ден организаторжо-шамыч пайдале занятийым эртарымылан, тыгак тушко ушнымылан тауштен, вес ганат тыгак погынаш кутырен келшеныт да рӱдерыште кружокын ончержым почаш темленыт.
М.ИВАНОВА.
Фотом Марий Эл Республикын Социальный вияҥмаш министерствыжын сайтше гыч налме.
