Марий кугыжаныш университетын аграрно-технологический институтшын 4-ше курсыштыжо тунемше Константин Карпов Челябинск область гыч Иван лӱман рвезылан донор лийын. Икшыве вӱр дене кылдалтше неле чер дене орланен.
Кум ий ончыч Константин икымше курсышто тунеммыж годымак «Подари надежду на жизнь» акцийыш ушнен. Тудым Российысе «Росплазма» медицинский научно-производственный рӱдер эртарен. Кок кече шуйнышо акцийыш тунам МарГУ гыч 400 утла студент, преподаватель, пашаеҥ ушнен.
А кок ий гыч пале лийын: Константинын вӱржӧ лейкемий дене черле Иванлан чыла шотыштат келшен толеш. Ятыр анализым сдатлымеке, шымлымашым эртымеке, тудо донор лийын. Лувем (костный мозг) клетке-влакым Санкт-Петербургышто Р.М.Горбачёва лӱмеш йоча гематологий да трансплантологий институтын клиникыштыже кусарен шынденыт. Кызыт рвезе тӧрланаш тӱҥалын. Тудо почеламутым воза, гитарым шокта.
Вузын пресс-службыжын палемдымыж почеш, Константин Карпов Российысе «Росплазма» медицинский научно-производственный рӱдерын «За содействие донорскому движению» медальже дене палемдалтын.
Л.Камалетдинова.
