Ончер
Михаил Скобелев
Ик жаплан эртыше пагытыш пӧртылтат
Йошкар-Оласе «Башне» тӱвыра да выставке рӱдерыште «Заморозка 3.0» ончерыште республикысе 12 сӱретче ден фотографын пашаштым ужаш лиеш.
Тушто кугу верым искусствовед Людмила Кувшинская ден тудын Полина ӱдыржын чумырымо коллекцийышт налеш.
Людмила Анатольевна – совет да россий искусствовед, Россий Федераций тӱвыран сулло деятельже, Марий АССР сымыктышын сулло деятельже, Россий сӱретче ушемын йыжыҥъеҥже, Марий Эл Республикыште икымше профессионал искусствовед.
Искусствовед 1988 гыч 2004 ий марте Республикысе сӱрет сымыктыш тоштерым вуйлатен. Тудын тӱҥалтышыж почеш тоштерын фондшо чумыралтын. Людмила Кувшинская республикнан сӱретчыже да тӱвыра пашаеҥже-влак нерген 200 утла публикацийым возен, тӱрлӧ авторын архившым поген. Коллекцийыштыже Марий АССР сымыктышын сулло деятельже, Икымше тӱнямбал ден Граждан сар-влакын участникше, сӱретче Иван Пландинын ятыр сӱретше уло.
«Башне» рӱдерыште Иван Михайловичын икмыняр радынажым ужаш лиеш. Сӱретлаштыже кучылтмо тӱс мемнам ик жаплан художникын илыме жапышкыже пуртат, тӱняумылымашыж дене палдарат. Иван Пландин утларакшым ужар чиям кучылтеш. «Суксо» радынаже поснак кумылым налеш. Ты пашам шымлен ончымо годым чоныш волгыдо шижмаш шыҥа. Южгунам Иван Михайлович радынаже гоч ончышо дене мутлана, тунамсе жап нерген каласкала манын шоналтет. Санденак, мыйын шонымаште, ты ончерыш мийыше кажне еҥ ала-мом ойыртемалтшым шижеш, шкаланже мом гынат кӱлешаным налын лектеш.
Михаил Скобелевын фотожо.
Снимкыште:
0300 — Людмила Кувшинская.



